Aqtóbede kógershin baǵatyndar arnaıy kórme ótkizdi

AQTÓBE. QazAqparat – Aqtóbede kógershin baǵyp, ony kóbeıtip otyrǵandar arnaıy kórme ótkizdi. Qus ósirýshiler Reseıden de keldi, dep habarlaıdy QazAqparat tilshisi.

Aqtóbe oblysy boıynsha «Chýjaıa belaıa ı rıaboı» kógirshin ósiretinder men áýesqoılar qoǵamdyq birlestigi Respýblıka kúnine arnap kórme ótkizdi.

Oǵan elimizdiń birneshe óńirinen jáne Reseıden qus baǵyp júrgen adamdar qatysty. Biri muny bıznes etip saýdalasa, ekinshisi jańa tuqym alyp, bir-birine almastyrdy.

«Qoǵamdyq birlestikte 60 adam bar. Biraq kógershin ósiretinder sany odan da kóp. Shamamen 200-ge jýyqtaıdy. Bul kórmege 30 túrli kógershin ákelindi. Azııalyq, ıaǵnı, Tashkenttiń qustary bar. Birinshiden, baǵasy qundy. Ekinshiden sapasy jaqsy. Qazaqstanda ǵana emes, Eýropada joǵary baǵalanady. Sapasy týraly aıtar bolsam, kógirshinniń óz parametri bolady. Aıdary, aıaǵynyń qaýyrsyny 2-3 qatar, moınynyń uzyndyǵy, júris-turysyna deıin baǵalanady. Aıdary ashylyp turǵan gúldeı bolady. Reseıden ádemilik úshin ustaıtyn kógershin keldi. Taýys qusqa uqsas», - dedi uıymdastyrýshylardyń biri Tóremurat Batyrǵarın. Ol qazirgi kezde 80-ge jýyq qus baǵady. Aıyna eki qap jem alady. Ári vaktsına salyp, kútimin jasaıdy.

«Ózim temirjolshymyn. Kógershindi bastaýysh synyp oqyǵanda ustap, baqtym. Sodan beri jarty ǵasyrdan astam ýaqyt ótti. Dárýmen berý, vaktsına salý, aýyrsa em júrgizý jolyn jetik meńgergen. Tipti shomyldyrý ýaqyty, ushyryp, qoraǵa qaıta qamaýdyń da joldary bar. Vaktsınany ár kógershinge jeke ózim egemin», - dedi ol.

Al keıbir aqtóbelik múgedek balasyna terapııalyq em júrgizý úshin baǵady. Birer jyl buryn dárigerler keńes berip, qaz-úırekpen birge kógershin ósirýdi jón kórdi.

«Eki balam erekshe kútimdi qajet etedi. Júıke júıesin tynyshtandyrý úshin dárigerler de, ózge adamdar da osy baǵytta em júrgizýge bolatynyn aıtty. Sóıtip biz de aqtóbelik qus ósirýshilerdiń qataryna qosyldyq. Ózimizde 30-ǵa jýyq kógershin bar. Balalarym qaraıdy. Kógershin jyly jerdi jaqsy kóredi. Dalaǵa serýendetemiz, ózderi qoraǵa barady. Keıde shatyrǵa da ustaımyz. Kórmede adamdar bizge kógershinniń birneshe túrin berdi. Reseıden kelgender bir danasyn 8 myń teńgege satty. Qyzyqqanymyzben, satyp ala almadyq. Taýys sııaqty aq qusty úıdiń ishinde de baǵýǵa bolady», - dedi Zına Sultanova.

Kógershinniń jemin berip qana qoımaı, arnaıy oıyndaryn da oınatyp turý kerek. Bul kórme-jármeńkede synalady.

«Asyl tuqymdy kógershinderdi túr-túsine qaraı ajyrata alamyz. Al ushqan kezde biri aınalyp, oınaıdy. Keıbiri bir jerde turyp, qanatyn qaǵady. Sonymen birge alysqa ushyp, qyzyqtyrady. Ózimde 30-ǵa jýyq qus bar. Jel kúni adasyp ketedi, al ózge kezde ushyramyz», - Nurtaı Muratov.

Aıta keteıik, kórme kezinde qany taza, ónerli, ádemi kógershin ıelerine arnaıy alǵys hat pen kýbok berildi.