Aqtóbede qoǵamdyq kólik pen kásiporyndar qalypty jumys istep tur

AQTÓBE. QazAqparat – Aqtóbe oblysynda jaǵdaı birtindep qalypqa kele bastady. Sýpermarketter, bazarlar, saýda úıleri, shaǵyn jáne orta bıznes shtattyq rejımde jumys istep tur, dep habarlaıdy QazAqparat tilshisi.

Halyqqa qyzmet kórsetý ortalyqtary men bankter jabyq. Keshe bankomattarda aqsha taýsyldy, degenmen, búgin ınkassatorlar olardy toltyra bastady. Sýpermarketter men ózge dúkender taýardy qolma-qol aqshaǵa satýda. Búgin birqatar termınal jumys isteı bastady. Qoǵamdyq kólik istep tur, biraq barlyq baǵyt jelige shyqpaǵan.

«Aqtóbede qoǵamdyq kólik qatynap jatyr, alaıda barlyq marshrýt jelide emes. Dúısenbi kúni barlyǵy jelige shyǵady dep oılaımyn. Bazarlar, sýpermarketter, dúkender jumys istep tur. Óńirde komendant Qanat Álıevtiń basshylyǵymen shuǵyl shtab uıymdastyryldy», - dedi qala ákiminiń baspasóz hatshysy Aıgúl Báımenova.

5-19 qańtar aralyǵynda aımaqta tótenshe jaǵdaı rejımi engizildi. Oǵan sáıkes, Aqtóbede saǵat 22.00 – 06.00 aralyǵynda komandanttyq saǵat belgilendi. ıAǵnı qala boıynsha jaıaý jáne kólikpen júrip-turýǵa tyıym salynǵan. Mıtıng ótken ortalyq dańǵyl aýmaǵynda qorshaýlar alynbaǵan.

Aqtóbe oblysy ákiminiń baspasóz qyzmetinen málim etkendeı, mıtıng kezinde tonaý faktileri bolǵan joq.

«Tonaý faktileri tirkelgen joq. Shaǵyn jáne orta bıznes, iri uıymdar jumys istep tur. Gaz 50-52 teńgeden satylýda, benzın bar. Oblys aýmaǵy boıynsha blok-beketter qoıyldy. Kúndizgi ýaqytta Aqtóbede júrip-turýǵa bolady. Biraq túngi ýaqytta qozǵalysqa tyıym bar», - dedi oblys ákiminiń baspasóz hatshysy Ǵanı Jákishev.