Aqtóbede qoǵamdyq shtab músheleri kún saıyn evakýatsııalyq pýnkttegi turǵyndarmen kezdesedi

<p>AQTÓBE. KAZINFORM &ndash; Qoǵamdyq shtab músheleri Aqtóbe qalasyndaǵy 7 evakýatsııalyq pýnktke kezekshilik etedi. Munda qazir turǵyndar baǵalaý komıssııasynyń qorytyndysyn kútip jatyr.</p>

Aqtóbe qalasy boıynsha 7 evakýatsııalyq pýnkt jumys istep tur. Onda 1105 adam bar. Onyń 511-i bala, ózgesi eresek. 

Foto: Aqtóbe qalalyq qoǵamdyq shtaby

«29 naýryz ben 10 mamyr aralyǵynda Aqtóbe qalasy Almaty jáne Astana aýdandary ákimdigine 3707 aryz tústi. Astana aýdanynda 106 aryz (60 turǵyn úıi, 33 saıajaı úıi, 13 bıznes nysany), Almaty aýdanynda 3601 aryz (324 turǵyn úıi, 3230 saıajaı úıi, 47 bıznes nysany) bar. Komıssııa eki aýdan boıynsha 3621 nysandy aralap ótti. Táýelsiz baǵalaý komıssııasy 2741 úıdi qarap, materıaldar jınaqtap jatyr. Almaty aýdany boıynsha 2700 úıge (280 jeke úı, 2420 saıajaı úıi) tehnıkalyq tekserý júrgizildi. Onyń ishinde 36 saıajaı úıiniń jaramsyzdyǵy anyqtaldy. Búgingi kúni Almaty aýdanynyń ákimdigi 106 otbasyna, ıaǵnı, jeke úı ıesine 318 mln teńgeden astam ótemaqy aýdardy. Al Astana aýdany boıynsha 41 úıge (31 jeke úı, 10 saıajaı úıi) tehnıkalyq tekserý, baǵalaý júrgizilip, 39 otbasyna 121 mln teńgeden astam ótemaqy tólendi»,- dedi Aqtóbe qalasy ákiminiń baspasóz hatshysy Aıgúl Baımenova.

Sonymen qatar 2060 otbasy birjolǵy tólemdi aldy.

«Qaladaǵy barlyq evakýatsııalyq pýnktte qoǵamdyq shtab músheleri bar. Sonymen birge Aqtóbe qalalyq ákimdiginiń bólim basshylary da sol evakýatsııalyq beketke baryp, turǵyndarmen kezdesip turady. Onda adamdar jeke-jeke máselesin aıtyp, sheshý joldary qarastyrylady. Máselen M.Ospanov atyndaǵy Batys Qazaqstan medıtsınalyq ýnıversıtetinde bilim alatyn stýdenttiń ata-anasy habarlasyp, kómek surady. Buǵan deıin oqý aqysyn ýaqytyly tólegen. Sý tasqyny kezinde qıyndyq týyndap, qazir kelissóz júrip jatyr. Jalpy kóbisi tehnıkalyq baqylaýdan keıin baǵalaýshy kompanııalardyń esebin alǵan. Aktige qol qoıyp, aqshany alǵan soń jóndeý júrgizýge kelisip otyr»,- dedi Aqtóbe qalalyq máslıhat depýtaty, qoǵamdyq shtab múshesi Jańalyq Ahash.

Aqtóbe qalasy boıynsha baǵalaý komıssııasynyń qorytyndysy shyǵatyn keste belgili. Alaıda baǵalaý komıssııasy erte esep berip, turǵyndarǵa qujatty tanystyryp jatyr.

«Tehnıkalyq baqylaýshynyń tekserýinen soń baǵalaý komıssııasynyń qorytyndysyn kórgen adam aktige qol qoımaı, sotqa da júgine alady. Bul – onyń quqyǵy. Zańgerler ony túsindirip jatyr. Sonymen birge baý-baqsha ujymynda turatyn adamdar úıiniń qujatyn rettemegen. Ózim baratyn M.Ospanov atyndaǵy Batys Qazaqstan medıtsınalyq ýnıversıteti jataqhanasynda osyndaı 20-ǵa jýyq otbasy bar. Keıbirinde qujat múlde joq, keıbiri durys emes. Olardyń máselesi óńirde qurylǵan «Qamqor Aqtóbe» qoryna baǵyttalady. Osy evakýatsııalyq bekettegi eki ájeni aýrýhanaǵa jatqyzyp, býyndaryn emdeýge de kelisip otyrmyz. Evakýatsııalyq pýnkttegi turǵyndar telefon nómirimizdi biledi, bizdiń taraptan kezekshilik te bar»,- dedi qoǵamdyq shtab múshesi Jańalyq Ahash.

Onyń aıtýynsha, buǵan deıin sý kirgen aýmaqta páter jaldan turǵan adamdar da evakýatsııalyq pýnktte ornalasqan. Olar páterin jalǵa berýshilermen ózara kelisip, shyǵyndy óteý kezinde ortaq mámilege kelýi kerek. Sebebi birjolǵy tólem, ótemaqy resmı úı ıesine beriledi.

Aıta keteıik, Aqtóbe qalasyndaǵy evakýatsııalyq pýnktterdiń bári oqý oryndarynyń jataqhanasynda ornalasqan. Mundaǵy turǵyndar sol mańdaǵy dámhanadan tegin tamaqtanady.