Aqtóbede qyzmettik kólikti ulyna berip qoıǵan ınspektsııa basshysy tártiptik jazaǵa tartyldy
Aqtóbe oblystyq orman sharýashylyǵy jáne janýarlar dúnıesi aýmaqtyq ınspektsııasynyń basshysy Ádilkereı Áýelbaevtiń balasy Baýyrjan Saǵıdýllaevtiń isi bıyl maýsymda qaraldy. Іs materıalyna súıensek, B.Saǵıdýllaev aýlada turǵan ákesiń qyzmettik kóligin aıdap ketip, monsha mańynda mas kúıinde ustalǵan. Sot qaýlysymen 15 táýlikke qamalyp, 7 jylǵa kólik basqarý quqyǵynan aıyryldy. Búgin osy is Ádep jónindegi keńeste qaralyp, talqylandy.
«Qyzmettik kólik memlekettik qyzmetti atqarýshy úshin beriledi. Sony atqaratyn ýaqytta ǵana paıdalaný kerek. Jeke basyna, otbasyna arnalmaǵan kólik. Kólikke tanys, týys otyra almaıdy, otyrýǵa quqyǵy joq. Bul jerde tún ortasynda júrgen. Polıtsııa ustady, mas kúıinde ekeni anyqtaldy. Kishkentaı mekeme emes, oblystyq mekeme. Úıde bolmaǵansyz, eńbek demalysynda boldyńyz. Aýlańyzda emes, mekemeniń aýlasyna, bolmasa aýyl sharýashylyǵyna qatysty mekemelerde qaldyrý kerek edi. Memlekettik múlik tek qyzmet babynda paıdalanatyn nárse. Sondyqtan qatań sógis berýdi usynamyn. Ujymda emes, otbasynda túsindirý jumystaryn júrgizý kerek. Árbir is-áreket mekemege, jeke basyńyzǵa áser etýi múmkin. Aınalyp kelgende memlekettik qyzmetpen qoshtasý da múmkin», - dedi Memlekettik qyzmet isteri agenttiginiń Aqtóbe oblysy boıynsha departamentiniń basshysy, Ádep jónindegi keńes tóraǵasy Aıbek Shilmanov.
Ádep jónindegi keńes otyrysy kezinde aýmaqtyq ınspektsııa basshysy Ádilkereı Áýelbaev esh qarsylyq kórsetpedi.
«Bári de ras. Qandaı sheshim shyǵarasyzdar, sony qabyldaımyn. Burynnan da memlekettik qyzmette kele jatyrmyn. Retin, zańdylyqtardy bilemin. Bolashaqta qyzmetti jalǵastyra beremin degen oıym bar. Qaı ýaqytta da Aqtóbe oblysynyń órkendeýine, kórkeıýine qyzmet jasap kele jatyrmyn», - dedi Ádilkereı Áýelbaev.
Aıta keteıik, Ádep jónindegi keńes músheleri qatań sógis túrindegi tártiptik jazaǵa tartty.