Aqtóbede kıiz úılerdiń ishine kórme uıymdastyryldy

AQTÓBE. QazAqparat - Naýryz merekesi kúni Aqtóbedegi kıiz úıler ishine kórme uıymdastyryldy. Bilim ordalary men mekemeler arnaıy taqyryptarǵa oraı kıiz úı ishin bezendirdi, dep habarlaıdy QazAqparat tilshisi.

Bıyl Aqtóbe qalasynda ótken Naýryz merekesinde kıiz úıdiń esigi ashyq turdy. Qazaq halqyna myń taǵzym stellasy mańyndaǵy kıiz úıler jeti taqyrypty qamtydy. Olar: «Men aqtóbelikpin», «Baqytty bala - Máńgilik el kepili», «Týǵan jerge taǵzym», «Rahanı jańǵyrý», «Naýryz - jyl basy», «Analarǵa taǵzym», «Astananyń 20 jyldyǵy».

«Temirjolshylar men №32 mektep gımnazııasynyń ujymy kıiz úı tigip, «Baqytty bala - Máńgilik el kepili» taqyrybyn qamtydy. Táýelsizdik alǵan jyldary jetken jetistigimizdi kórsetip, arnaıy maket daıyndaldy. Sonymen qatar, besik, at ábzelderi, ulttyq qolóner buıymdary kórmege qoıyldy. Bul arqyly biz salt-dástúrin saqtap, ustanǵan ult máńgilik el bolatynyn kórsetkimiz keldi. Adamdar kıiz úıge kirip, tanysyp, alǵysyn bildirip jatty»,- dedi aqtóbelik ardager Boshyq Qýatov.

Al «Analarǵa taǵzym» taqyrybyn qamtyǵan kıiz úıde jańa joba tanystyryldy. Analarǵa taǵzym ortalyǵy jazda ashylyp, munda qyzdarǵa ulttyq tárbıe beriledi. Oqýshylar is tigýdi, sán ónerin úırenip, ájelerdiń ómirlik tálimin alady.

«Analarǵa taǵzym ortalyǵy elimizdiń boıynsha tuńǵysh joba bolyp tur. Maýsymda qoldanysqa beriledi. «Qyz - eldiń kórki» baǵdarlamasy aıasynda 7-17 jastaǵy qyzdarǵa ulttyq tárbıe beriledi. Ádep, sulýlyq syry úıretiledi. Úı jınaý, tamaq ázirleý, qolóner buıymdaryn daıyndaýdyń bárin meńgeredi. Sonymen qatar, elimizdiń, óńirdiń damýyna úles qosqan qyz-kelinshekterdiń, apalarymyzdyń ómir tarıhyn bilýge bolady. Óskeleń urpaqty tárbıeleýde úlgi bolar analardyń ómiri nazardan tys qalmaıdy. Bári mýzeıde qarastyrylady. Innovatsııalyq zaldy aqparattyń bárin elektrondy túrde alýǵa bolady»,- dedi uıymdastyrýshylar.

Sonymen qatar, kıiz úıde «Aqtóbe» fýtbol klýby men aqtóbelik sportshylar  kezdesý uıymdastyrdy. Qolóner sheberleri óz buıymdaryn tanystyrdy.