Aqtóbede kepilde bolǵan áıel ata-anasynyń kóz jumǵanyn bilmeıdi

<p>AQTÓBE. KAZINFORM &ndash; Aqtóbelik dárigerler kepilde bolǵan áıeldi emdeý sharasyn jalǵastyryp jatyr. Ázirge naýqasqa telefonyn bermegen, ol ata-anasynyń kóz jumǵanyn bilmeıdi.</p>

Dúısenbiniń túninde kepilde bolǵan 40 jastaǵy áıel endi-endi es jıyp, jan-jaǵyn tanydy. Naýqasty Aqtóbe oblystyq kópsalaly aýrýhanasynyń neırohırýrgtary men travmatologtary emdep jatyr.

- Em júrgizilip jatqanyna bir táýlikten asty. Oǵan bas-mı jaraqaty, mıdyń shaıqalýy dıagnozy qoıylǵan. Al travmatologtar jaraqatyn tańyp beredi. Eki bólim jaýapty bolǵanymen, neırohırýrgııada emin jalǵastyrady. Kógergen, jyrylǵan jerleri bar. Búgingi tańda jaǵdaıy ortasha. Sana-sezimi ashyq. Suraqtarǵa naqty jaýap beredi. Búgin ne bolǵanyn surady. Ol ata-anasynyń qaıtys bolǵanyn bilmeıdi. Jaǵdaıdyń qalaı bolǵanyn, ne bolǵanyn bilgisi keldi. Biz ol týraly emes, densaýlyǵy týraly kóbirek aıtamyz. Tósekten turýǵa bolmaıdy. Júrýge ruqsat etken joqpyz. Onyń qolynda ázirge telefon joq. Psıhologtar da keshe de, búgin de kezdesti. Mundaı dıagnozben 5-7 kún em alady. Biraq ári qaraı belgili bolady. Sebebi psıhologııalyq jaǵdaıy eskeriledi. Qazir kúzet tur, - dedi Neırohırýrgııa bóliminiń meńgerýshisi Maqsat Ýrazjanov.

Eske salsaq, 13 qańtar kúni túnde Aqtóbede túnde 75 jáne 67 jastaǵy qos qarııa kóz jumdy.  Al tiri qalǵan 40 jastaǵy áıel aýrýhanada em alyp jatyr.

Dárigerler aýrýhanaǵa ákelingen qarııada da, aman qalǵan áıelde de pyshaq jaraqaty bolmaǵanyn habarlady.

Osy oqıǵadan soń Qylmystyq kodekstiń «Adam óltirý», «Adamdy kepilge alý» baptary boıynsha is qozǵalyp, tergeý júrip jatyr.