Aqtóbede keler jyly 12 aýylǵa gaz, 12 aýylǵa sý qubyry tartylady
Aqtóbe oblysy 2023-2025 jyldarǵa arnalǵan bıýdjetti bekitti. Úsh jyldyq bıýdjet 1,4 trln teńgeden asady. Keler jyly oblys bıýdjeti 462,6 mlrd teńgeni quraıdy. Qazyna qarjysynyń kóbi áleýmettik salaǵa tıesili.
«Biz turaqty ekonomıkalyq ósimdi qamtamasyz etý jáne óńir turǵyndaryna qolaıly jaǵdaılar jasaý úshin barlyq salada jumysty qarqynmen jalǵastyratyn bolamyz. 2023 jylǵa kelesi josparlarymyzdy quryp otyrmyz:
- keminde 1 trln teńge ınvestıtsııa tartý;
- óńir ekonomıkasyndaǵy shaǵyn jáne orta bıznes úlesin 21,3%-dan 25% – ǵa deıin ulǵaıtý;
- 4,9 mlrd teńgege 5 myń halqy bar 12 aýyldy ortalyqtandyrylǵan sýmen qamtamasyz etý (halyqty aýyz sýmen qamtý deńgeıi – 98,8%);
- 10,5 mlrd teńgege 9 myń halqy bar 12 aýylǵa kógildir otynyn jetkizý (halyqty gazben qamtý deńgeıi – 94,4%);
- avtojoldardy jóndeý jáne salý boıynsha 37,4 mlrd teńgege 763 shaqyrym nemese 129 jobany iske asyratyn bolamyz (2023 jyldyń sońyna normatıvtegi jaǵdaıdaǵy jergilikti mańyzy bar joldardyń úlesi - 78 %)», - dep habarlady oblys ákiminiń baspasóz qyzmeti.
Jalpy Aqtóbe oblysynda áli de 60 aýyl aýyz sýsyz otyr. 2025 jylǵa deıin barlyq aýyl tirshilik nárimen qamtamasyz etilýi tıis bolsa, bul tapsyrmany oryndaý úshin jobalyq-smetalyq qujattar ázirlenip jatyr.
«2025 jylǵa deıin aýyldardy aýyz sýmen qamtý jumysy kezeń-kezeńimen júrgiziledi. Atap aıtqanda 21 aýylǵa ortalyqtandyrylǵan aýyz sý quryby tartylady. Onyń ishinde 13-ine jobalyq-smetalyq qujat ázirlenip jatyr. Qazir 8-inde joba ázirlenip, saraptamanyń oń qorytyndysy alyndy. Taǵy 15 aýylǵa keshendi blok modýl ornatylady. Qalǵan 24 aýyl turǵyndary keshendi blok modýl ornatýdan bas tartty. Olarda qudyq bar, tuşy sý qoljetimdi. Sonymen birge 2025 jylǵa deıin damý áleýeti tómen aýyldardy ońtaılandyrý iske asyrylady»,- dedi Aqtóbe oblystyq energetıka jáne turǵyn úı-kommýnaldyq sharýashylyq basqarmasy basshysynyń orynbasary Nurtaı Sertaev.
Aqtóbe oblysynda qazir 327 eldimeken bar. Onyń 153-i nemese 47% gazben jabdyqtalǵan. Bıyl 11 aýylǵa gaz berildi. Áli de 170 aýylǵa qubyr tartyp, kógildir otyn jetkizý kerek.
«2027 jyldyń sońyna deıin 95 eldimekendi gazdandyrý josparlandy. Sol kezde halyqtyń 98 paıyzy, eldimekenderdiń 76,2 paıyzy gazben qamtamasyz etiledi», - dedi Nurtaı Sertaev. Al halyq sany az aýyldar ońtaılandyrylady.