Aqtóbede Qazaqstandaǵy alǵashqy kreatıvti ortalyq ashyldy

AQTÓBE. QazAqparat - Aqtóbe oblysynda Memleket basshysynyń kreatıvti ındýstrııany damytý baǵytyndaǵy tapsyrmasyn oryndaý maqsatynda tıisti sharalar qabyldanyp jatyr. Búgin Saǵı Jıenbaev atyndaǵy oblystyq jasóspirimder kitaphanasy bazasynda Qazaqstandaǵy alǵashqy kreatıvti ortalyq óz jumysyn bastady, dep habarlaıdy QazAqparat.

Onyń ashylýyna Aqtóbe oblysynyń ákimi Eraly Toǵjanov, «Samuryq-Qazyna» AQ qoǵammen baılanys, áleýmettik-eńbek qatynastary jáne eńbekti qorǵaý jónindegi basqarýshy dırektory Ǵıbrat Aýǵanov jáne óńirdiń talantty jastary qatysty.

Joba Aqtóbe oblysy ákimdigi jáne bas demeýshi «Samuryq – Qazyna» AQ kompanııalar tobynyń «Samruk-Kazyna Trust» KQ qarjylaı qoldaýymen júzege asyryldy.

Jobanyń basty mıssııasy – Aqtóbe oblysy jastarynyń basyn biriktirý, zamanǵa sáıkes erkin formatta jumys isteıtin kreatıvti ortalyqqa aınaldyrý.

Atalǵan joba óńirdiń mádenı jáne shyǵarmashylyq ómirin damytýǵa jańa serpin berip, jastardyń mansaptyq jolynda tabysqa jetýine qajetti daǵdylar men bilimin jetildirýge óz septigin tıgizedi.

«Kreatıvti ındýstrııa ekonomıkanyń draıverine aınalýy tıis. Memleket basshysy osyndaı mindet qoıyp otyr. Biz zamannyń aǵynyna ilese alatyn jáne damyǵan elderdiń kásibı jas mamandarymen básekelese alatyn bilimdi jastardy tárbıeleýimiz kerek. Kreatıvti ortalyqtar bizdiń rýhanı qundylyqtarymyzben úndestik taba bilýi kerek. Olardy dáripteýde kitaphanalar mańyzdy ról atqarady. Bizdiń mindetimiz - kreatıvti ındýstrııany damytý, talantty jastardyń mádenı áleýetin tolyqqandy júzege asyrý úshin qolaıly jaǵdaı jasaý. Kreatıvti ortalyqtyń ashylýy - bul óskeleń urpaqtyń bolashaǵyna salynǵan ınvestıtsııa. Atalǵan joba barlyq talaptarǵa jaýap beredi jáne oblystyń barlyq jastarynyń basyn biriktiredi. Munda zııatkerlik jáne shyǵarmashylyq turǵydan damýǵa, kásibı biliktilik pen jeke qabiletti arttyrýǵa bolady», - degen Eraly Toǵjanov «Samuryq-Qazyna» ulttyq ál-aýqat qorynyń ókilderine ortalyqty ashýdaǵy úlesi úshin alǵys aıtty.

Shyǵarmashylyq ortalyq jastardyń qyzyǵýshylyǵyna baılanysty túrli taqyryptyq aımaqtardan turady.

Ortalyqta túrli basqosýlar, ıdeıalardy bólisýge arnalǵan komıýnıtı speıs, IT mamandarǵa arnalǵan IT stýdııa, anımatsııa ortalyǵy, talantty jandarǵa arnalǵan dybys jazý ortalyǵy men fotostýdııa, taqyryptyq kitap zaldary, TIKTOK aımaqtary, sýretshiler, dızaınerler jáne sáýletshilerge arnalǵan sheberhanalar, keshki kórsetilimderge arnalǵan kıno ekrany bar kóshe rekreatsııalyq aımaǵy jastarǵa oıdaǵy jobalaryn júzege asyrýǵa, kontent jasaýǵa, talanttaryn shyńdaýǵa múmkindik beredi.

Aıta keteıik, jobanyń avtorlary – Q88 Qazaqstan ýrbanıster qaýymdastyǵy jáne Almaty Creative Bureau.