Aqtóbede «Qazaq halqyna myń alǵys» stellasy boı kóterdi
Aqtóbedegi Tuńǵysh Prezıdent atyndaǵy ortalyq saıabaq janynan «Qazaqstan halqyna myń alǵys» stellasy boı kóterdi. Qazaqstan halqynyń birligin, tatýlyǵyn bildiretin eskertkishtiń bıiktigi 30 metr, kompozıtsııasy 5 bólikten turady. Stellada Qazaqstannyń kartasy beınelengen. Bul - el shekarasyn aıqyndap, landshafty men oblystardyń ornalasýyn, Astana qalasy týraly aqparat beretin bóligi.
Odan joǵary 7 kezeńge bólingen arnaıy taqta bar. Onda Ejelgi Qazaqtan (b.z.d VII-b.z VII ǵ.ǵ), Orta ǵasyrdaǵy Qazaqstan (VII-XVIII ǵ.ǵ), Qazaq handyǵy tusyndaǵy Qazaqstan (1465-1860 jj.), Reseı ımperııasy quramyndaǵy Qazaqstan ( 1860-1917 jj.), soǵysqa deıingi jyldardaǵy Qazaqstan (1917-1941 jj.), soǵystan keıińgi jyldardaǵy Qazaqstan (1941-1990 jj.) jáne Egemendi Qazaqstan (1991 j.) týraly kórinis beretin sýretter tasqa túsirilgen.
Stellanyń ushar basynda qanatyn keńge jaıǵan qyran qusy ornalasqan. Kıiz úı, shańyraq ta beınelengen.
«Elbasy Nursultan Nazarbaev táýelsizdik alǵan kúnnen bastap ulttar arasyndaǵy dostyq, tatýlyq, turaqtylyqqa nazar aýdardy. Táýelsizdik alǵan 26 jyl ishinde Qazaqstan dúnıejúzine óz orny bar ekenin dáleldedi. Halyqaralyq uıymdardyń barlyǵy Qazaqstandy moıyndady. Prezıdent Nursultan Nazarbaevtyń syrtqy, ishki saıasatty qatar alyp júrýi, elimizdiń mártebesin arttyra tústi. Qazir Qazaqstannyń eń úlken jetistigi - ulttar arasyndaǵy tatýlyqty, birlikti saqtaýy. Qanymyzǵa sińgen qasıet bar. Biz - baýyrmalmyz. Asharshylyq, soǵys kezinde Qazaqstan mıllıondaǵan adamdardy týǵanyndaı qarsy aldy»,- dedi Aqtóbe oblysynyń ákimi Berdibek Saparbaev.
Óńir basshysy bul eskertkish jastarǵa úlgi-ónege beretin orynǵa aınalatynyna senim bildirdi. Ári qazaq halqyn saqtap qalý úshin salt-dástúrdi, ádet-ǵurypty ustaný paryz ekenin jetkizdi.
Jańa nysandy aqtóbelik «Aqtóbe sáýlet», «Soleres» kompanııalary qarjy bólip, salyp berdi. Stellanyń ashylýyna qatysqan ózge ult ókilderi de halyq bas qosatyn, mádenı, rýhanı sharalardyń uıytqysy bolar orynnyń qurylysyna rızashylyqtaryn bildirdi.
«Óńirde óner ortalyǵy, shyǵarmashylyq ortalyǵy, bilim, densaýlyq saqtaý ortalyqtary ashylyp jatyr. Bári kóz qýantady. Halyq pen bılik - bir, birigip jumys istep jatyr. Bizdi sol qýantady. Qazaq halqy qonaqjaı, kórshisin syılaıdy. El erteńi úshin tatýlyqty, yntymaqty tańdady. Sondyqtan bolar, Qazaqstanda turatyn ár ózge ult ókili qazaq halqyna únemi alǵysyn bildirip keledi. Tatýlyǵymyz, birligimiz jasaı bersin»,- dedi Aqtóbe oblystyq máslıhatynyń depýtaty Sergeı Vıshnıak.