Aqtóbede kásipkerdiń balasy mas kúıinde kólik júrgizgeni úshin 15 táýlikke qamaldy

<p>AQTÓBE. KAZINFORM — Aqtóbedegi qoǵamdyq tasymaldaý kompanııasy ıesiniń balasy B.Sagıdýllaev mas kúıinde kólik júrgizip, jol erejesin buzǵany úshin ákimshilik jaýapqa tartyldy. Ol 15 táýlikke qamalyp, kólik júrgizý quqyǵynan 7 jylǵa aıyryldy.</p>

Aqtóbe qalasynyń ákimshilik quqyq buzýshylyqtar jónindegi mamandandyrylǵan aýdanaralyq sotynda Bekjan Sagıdýllaevqa qatysty eki is qaraldy.

Birinshisi — Ákimshilik quqyq buzýshylyq týraly kodeksiniń 608-baby 1-bóligi. ıAǵnı, júrgizýshiniń kólik quralyn alkogol, esirtkige jáne (nemese) ýytqumarlyq mas kúıde basqarýy, sol sııaqty kólik quralyn alkogol, esirtkige jáne (nemese) ýytqumarlyq mas kúıdegi adamnyń basqarýyna berý baby. 

Іs materıalyna súıensek, B. Sagıdýllaev 22 qyrkúıek kúni shamamen 04:12–de Aqtóbe qalasy Á.Moldaǵulova dańǵyly «Pablo» meıramhanasyna qarama qarsy jerde alkogolge mas kúıinde kólik quralyn basqarǵan. 

Jaýapker sotta demalys ornyna taksımen kelgenin, al kólikti aǵasy ákelip tastaǵanyn aıtty. Ol kólikke otyrǵan sátte polıtsııa qyzmetkerleriniń ustap alǵanyn habarlady.

Medıtsınalyq saraptama alǵashynda eshteńe kórsetpegenin, al polıtsııa ınspektorymen qaıta ótkende «ishimdik ishken» degen qorytyndy jasalǵanyn aıtty.

Sotta psıhıkalyq belsendi zat paıdalaný jáne mas bolý faktisin anyqtaý úshin jasalǵan medıtsınalyq kýálandyrýdyń qorytyndysy, quqyqbuzýshylyq beınelengen beınejazba kórsetildi.

Onda «Lexus LX 600» kóligimen eki baǵytty tórt nemese odan da kóp jolaǵy bar jolǵa shyqqany, polıtsııa qyzmetkerleri artynan qýyp toqtatqany, kólik quralynan B.Sagıdýllaevtiń shyqqany kórinedi. Medıtsınalyq kýálandyrýdyń qorytyndysyna sáıkes jeńil dárejedegi alkogolge mas kúıde bolǵany anyqtalǵan. 

Sot qaýlysymen Bekjan Sagıdýllaev Ákimshilik quqyq buzýshylyq týraly kodeksiniń 608-baby 1-bóligimen kináli dep tanylyp, 15 táýlikke ákimshilik qamaqqa alyndy jáne 7 jylǵa kólik quralyn basqarý quqyǵynan aıyryldy.

Sonymen birge Ákimshilik quqyq buzý týraly kodeksiniń 596-babynyń 3-bólimimen jazalandy. 

Sot kabınetindegi ashyq aqparatqa súıensek, alty jolaǵy bar eki jaqty qozǵalystyń júrý jolynda qarsy baǵytqa arnalǵan jaǵyna shyǵyp júrgeni belgili boldy. 

Sot qaýlysymen kináli dep tanylyp, taǵy 6 aı merzimge kólik quralyn basqarý quqyǵynan aıryldy. 

Eske salsaq, Aqtóbe polıtsııasy rýlge mas kúıinde otyrǵan 29 jastaǵy júrgizýshini tekserdi. Júrgizýshi saraptamadan shyǵa sala áıeliniń kóligine minip alady.

Osy iste polıtsııa qyzmetkerin kólik kapotyna salyp súıregen áıelge qatysty is bólek qaralady. Al 29 jastaǵy júrgizýshi kásipkerdiń balasy bolyp shyqty.