Aqtóbede kásipker tapshylyq kezin paıdalanyp gazdy qymbatqa satqan

<p>ASTANA. KAZINFORM - Aqtóbe oblysynyń Hromtaý qalasynda kásipker gaz tapshylyǵyn paıdalanyp, quny 59 teńge turatyn áleýmettik suıytylǵan gazdy 70 teńgeden satqan, dep habarlaıdy Saýda komıtetiniń baspasóz qyzmeti.&nbsp;</p>

«Samara-Shymkent» trassasy boıynda ornalasqan janarmaı quıý beketinen qymbat baǵany baıqaǵan qala turǵyny shaǵym qaldyrdy.

Osy jaǵdaıǵa qatysty túsken materıaldar negizinde Aqtóbe oblysy boıynsha Saýda jáne tutynýshylar quqyqtaryn qorǵaý departamenti istiń mán-jaıyn muqııat zerttep, janarmaı quıý beketiniń áreketteri QR Ákimshilik quqyq buzýshylyq týraly Kodeksiniń 193-babynyń 4-bóligin buzatynyn anyqtady. Janarmaı quıý stantsııasynyń ıesine ákimshilik hattama toltyrylyp, aıyppul salyndy.

"Suıytylǵan gaz Aqtóbe oblysyndaǵy avtokólik ıeleri arasynda úlken suranysqa ıe. Oblysta 50 myńnan astam gazben júretin kólik tirkelgen, oǵan qosa tranzıttik kólikter. Sońǵy ýaqytta suıytylǵan gazdy tutynýdyń ósýine baılanysty avtogaz quıý beketterinde gaz tapshylyǵy baıqalady. Osy oraıda keıbir kásipkerler b jaǵdaıdy paıdalanyp, artyq paıda tabýǵa tyrysyp jatyr. Degenmen baǵany negizsiz ósirýge, ásirese tapshylyq týyndaǵan sátte ónimniń qunyn arttyrýǵa bolmaıtynyn kásipkerlerdiń taǵy bir esine salǵymyz keledi", - dedi óńirlik departament basshysy Qaırat Raıymqulov.

Sonymen qatar saýda zańnamasyna memlekettik baqylaý júrgizý aıasynda el aýmaǵynda baǵa beligisinde kórsetilgen baǵadan qymbat taýar satqan 68 kásipkerlik sýbektisin jaýapkershilikke tartty. Bul sharalar tutynýshylardyń quqyqtaryn qorǵaý jáne baǵa saıasatynyń zańdylyǵyn qamtamasyz etýge baǵyttalǵan.

Aqtóbe oblysy boıynsha osyndaı quqyq buzýshylyqtar anyqtalǵan jaǵdaıda 8(7132)54-81-26 telefony arqyly departamentke habarlaýyńyzdy suraımyz.nemese «E-otinish» portaly arqyly jazbasha aryz-shaǵym qaldyrýǵa bolady.