Aqtóbede káriz-sorǵy stansasy operatorynyń denesin 90-95% kúıik shaldy

AQTÓBE. QazAqparat – Aqtóbe oblysy Temir aýdany Keńqııaq aýylynda káriz-sorǵy stansasynda gaz-aýa qosyndysy atylyp, operator áıeldiń denesin kúıik shaldy. Aldyn ala boljam boıynsha, ol esikti ashyp, ózi sirińke tutatqan, dep habarlaıdy QazAqparat tilshisi.

Aqtóbe oblysy ákiminiń baspasóz qyzmetinen málim etkendeı, oqıǵa keshe saǵat 22:55-te tirkeldi. Keńqııaq aýyldyq aýrýhanasyna «Keńqııaq-SK» KMK káriz-sorǵy stansasynda jumys isteıtin operatordyń kúıik shalyp túskeni belgili boldy.

«Aldyn ala boljam boıynsha, operator káriz jınaý beketiniń esigin alyp, shyrpy tutatqan. Kúıik shalǵan kezde birden kúıeýine habarlasyp, ol aýrýhanaǵa jetkizgen.

Qazirgi kezde káriz stansasy shtattyq rejımde jumys istep tur. Tergeý jumystary júrip jatyr. Aldyn ala boljam boıynsha oqıǵanyń sebebi – órt qaýipsizdigi erejesiniń saqtalmaýy. Naýqastyń denesiniń 90-95% kúıik shalǵan. Keńqııaq aýyldyq aýrýhanasy alǵashqy kómek kórsetti. Al túnde áıeldi sanavıatsııamen oblys ortalyǵyna jetkizdi», - dep aqparat taratty oblys ákiminiń baspasóz qyzmetinen.

Eske salsaq, Aqtóbeniń Keńqııaq aýylynda buǵan deıin munaı-gaz kesheni órtenip, tórt jumysshyny kúıik shaldy. Olar oblys ortalyǵy men Astana qalasyndaǵy aýrýhanaǵa jetkizildi. Eki jumysshy aýrýhanada kóz judy.