Aqtóbede karantın jeńildep, balalar qaıtadan mektepke barady
Aqtóbe oblysy «sary» aımaqta. Búgin oblystyq bas sanıtarııalyq dárigeriniń jańa qaýlysy shyqty. Qaýlyǵa sáıkes áli de bilim berý mekemelerindegi ashana jumysyna tyıym salynǵan. Sonymen birge ujymdyq aýyzashar ótkizýge bolmaıdy. «ASHYQ» jobasy engizilgen bolsa boýlıng, kompıýterlik klýbtar, onyń ishinde PlayStation klýbtary, bılıard, karaoke óz klıentterin qabyldaı alady. Al balalardyń oıyn-saýyq ortalyqtary, túngi jáne oıyn klýbtary, kalıan, býkmeker keńseler men loto-klýbtar áli de jabyq turady. Adamdar kóp jınalatyn konferentsııalar, forýmdar, oıyn-saýyq, sondaı-aq otbasylyq, saltanatty, estelik jáne basqa da is-sharalardy ótkizýge bolmaıdy.
«Kontıngenti 300 oqýshyǵa shaqtalǵan qalalyq jáne aýyldyq mektepter jumysyn bastaıdy. Munda ár synyptaǵy bala sany 25-ten aspaýy tıis. Sonymen birge jalpy bilim beretin mektepterde barlyq synyp oqýshylary aralas formatta bilim alady. Munda da bala sany 25-ten aspaýy tıis. Pánderdiń 70 paıyzyn mektepte oqıdy. Bilim berý mekemesi ákimshiliginiń sheshimi boıynsha sabaqtan tys ýaqytta bala sanyn 15-ten asyrmaı jeke oqytý uıymdastyrýǵa ruqsat. Arnaıy, mamandandyrylǵan uıymdar, erekshe bilim berý qajettilikteri bar balalarǵa arnalǵan arnaıy mektep-ınternattar, jalpy tıptegi mektep-ınternattar jáne daryndy balalarǵa arnalǵan mektep-ınternattar, orta jáne joǵary oqý oryndarynyń I kýrs stýdentteri úshin shtattyq oqytýǵa ruqsat beriledi», - dep habarlady Aqtóbe oblystyq sanıtarııalyq-epıdemıologııalyq baqylaý departamenti.