Aqtóbede Qańtar oqıǵasyna qatysqan 18 adamnyń isi sotta qarala bastady

AQTÓBE. QazAqparat – Aqtóbe oblystyq qylmystyq ister jónindegi mamandandyrylǵan aýdanaralyq sotynda Qańtar oqıǵasyna qatysqan 18 adamnyń isi qaralyp jatyr. Búgin aıyptaý aktisi oqyldy, dep habarlaıdy QazAqparat tilshisi.

Qańtar oqıǵasyna qatysqan aıyptalýshylardyń isi Qylmystyq kodekstiń birneshe baby boıynsha qaralyp jatyr.

Olar - «Jappaı tártipsizdik», «Quqyq qorǵaý organy, arnaýly memlekettik organ qyzmetkeriniń, áskerı qyzmetshiniń ómirine qolsuǵýshylyq», «Qarýdy, oq-dárilerdi, jarylǵysh zattar men jarylys qurylǵylaryn jymqyrý ne qorqytyp alý» baptary.

Barlyǵy sot zalynda 18 aıyptalýshy bar. Sonymen birge 33 jábirlenýshiniń kóbi - quqyq qorǵaý organdarynyń qyzmetkerleri.

Qazirgi kezde aıyptalýshylardyń úsheýi qamaýda bolsa, ózgesi úıqamaqta.

Prokýror Ásel Tanalıevanyń aıtýynsha, Aqtóbedegi jappaı tártipsizdik kezinde biri alańǵa qıyrshyq tas tasymaldasa, biri áleýmettik jeli arqyly halyqty alańǵa shaqyrǵan.

Sonymen birge aqsha jınap, jınalǵandardy azyq-túlikpen, qajetti gıgıenalyq zattarmen qamtamasyz etken.

Atap aıtsaq, aıyptalýshy Erkebulan Quttybaev pen onyń tanysy Darhan Ábıev eki júk kóligine tas tıep, ákimdik ǵımaraty mańyna tókken.

Sol jerge jınalǵandar ony paıdalanyp, laqtyra bastaǵan. Al Nursultan Isaev jeke kóligimen polıtsııa qyzmetkerlerin qasaqana túıgen dep aıyptalyp jatyr.

Prokýrordyń aıtýynsha, ol ýchaskelik ınspektor, kóshi-qonys ınspektoryn qaqqan. Ákimdikke qaraı júrgen.

Aıta keteıik, Qańtar oqıǵasy kezinde kelgen jalpy shyǵyn 148 mln teńgeden asady. Onyń 114 mln teńgeden astamy oblystyq ákimdikke tıesili.

Eske salsaq, bıyl 5 qańtarda Prezıdent Aqtóbede tótenshe jaǵdaı jarııalaý týraly jarlyqqa qol qoıdy.

Komendanttyq saǵat tártibin buzǵan adamdar ákimshilik jaýapqa tartyldy.

Polıtsııa sol kezde jýrnalısterden túsinikteme aldy.