Aqtóbede qansyrap jatqan oqýshyǵa senbegen tótenshe jaǵdaılar qyzmetkeri sottaldy

<p>AQTÓBE. KAZINFORM &ndash; Aqtóbe qalalyq sotynda qansyryp jatqan oqýshyǵa senbeı, der kezinde kómek jibermegen &laquo;112&raquo; qyzmetkerine 6 aıǵa bas bostandyǵynan shekteý jazasy taǵaıyndaldy. Sonymen birge ol moraldyq shyǵyn retinde 1 mln teńge tóleıdi.&nbsp;</p>

Aqtóbe qalalyq sotynda Qylmystyq kodekstiń «Salǵyrttyq» baby boıynsha sottalýshy A.Birjanovqa qatysty is qaraldy. Іs materıalyna súıensek, byltyr anasy men aǵasy pyshaq jaraqatynan kóz jumyp, ózi ǵana aman qalǵan oqýshy «112» telefon nómirine birneshe ret habarlasyp kómek suraıdy. Sol kezde sottalýshy A.Birjanov onyń sózine senbeı, birneshe ret tutqany qoıa salǵan. Saldarynan jábirlenýshi der kezinde kómek ala almady. Sóıtip oqýshy úsh ret habarlasyp, arada 50 mınýt ótkende ǵana jedel járdem jiberildi.

Aqtóbe oblystyq soty baspasóz qyzmetiniń habarlaýynsha, sottalýshy óz kinásin tolyq moıyndamady ári alǵashqy qońyraýdy balanyń oıyny dep qabyldaǵanyn ashyq aıtty.

- Qorǵaýshy tarap, oblystyq TJD basshyǵyly ony tártiptik jazaǵa tartyp, 2023 jyldyń sáýir aıynda qyzmetinen bosatqanyn alǵa tartty. Biraq bul qylmystyq jaýapkershilikten bosatpaıdy. Birjanov Abylaıhan Qylmystyq kodekstiń «Salǵyrttyq» baby boıynsha aıypty dep tanylyp, 6 aıǵa bas bostandyǵanan shekteý jazasy taǵaıyndalsyn. Osy ýaqyt aralyǵynda probatsııalyq baqylaýǵa alynsyn, - dedi sýdıa Ahmetqalı Moldaǵalıev. 

Aıta keteıik, jábirlenýshige 1 mln teńge moraldyq shyǵyn óndiriledi. Sot úkimi zańdy kúshine engen joq.

Eske salsaq, byltyr Aqtóbede anasy men balasyn bir túnde pyshaqtap ketti. Ustalǵan sottalýshy ýaqytsha ustaý ızolıatorynda óz-ózine qol jumsap, kóz jumdy. Degenmen sottalýshysy bolmasa da qazir sot otyrysy bolyp jatyr.