Aqtóbede qamystan tutanǵan órt baý-baqsha ujymdaryna jaıylǵan

<p>AQTÓBE. KAZINFORM &ndash; Aqtóbe qalasynda aýmaǵy 5 ga jaıylǵan órt sóndirildi. Munda órt sóndirýshilermen qatar orman sharýashylyǵy qyzmetkerleri jáne áskerıler jumyldyryldy.</p>

Aqtóbe qalasynyń irgesindegi Sazdy ózeni boıynda qamys órtenip, jalyn baý-baqsha ujymyna tarady. Mundaǵy keıbir úıde adamdar bolyp, habarlandyrý berildi. Sol kezde turǵyndar úıin tastap, qaýipsiz jerge shyǵyp turdy.

Foto: Kazinform/Altynaı Saǵyndyqova

- Saǵat 13:28-de Aqtóbe qalasy Astana aýdany Lesnoe eldimekeni aýmaǵynda qamys janyp jatqany týraly aqparat kelip tústi. TJD garnızonynan barlyǵy 66 adam, 12 tehnıka jumyldyryldy. Sonymen birge 20892 áskerı bólimi, orman sharýashylyǵy men jergilikti atqarýshy organdary men memlekettik emes órtke qarsy uıymdary jumyldyryldy. Órt saǵat 17:00-de tolyq sóndirildi. Baý-baqshadaǵy 50 úı jáne bir kólik aman qaldy, - dedi Aqtóbe oblystyq TJD bastyǵynyń orynbasary Aıbat Jańabergenov.

Órt kezinde adamdar zardap shekpedi. Alaıda eki úıdiń sharýashylyq qurylysy janyp ketti. TJD qyzmetkerleri áli de oqıǵa ornynda júr. Aqtóbe qalasy ákiminiń baspasóz qyzmetiniń habarlaýynsha, Lesnoe, Dorojnık, Lokomotıvnoe depo baý-baqsha ujymdarynda, órt bolǵan alqapqa jaqyn mańdaǵy aýmaqta shamamen 130 saıajaı úıi bar.

Eske salsaq, oqıǵa ornyna 30 polıtsııa qyzmetkeri jiberilgen. Olar da qaýipsizdikti qamtamasyz etti.

Jyl basynan beri beri óńirde 442 órt oqıǵasy tirkeldi. Byltyr osy kezde 462 órt bolǵan.