Aqtóbede qaltaly azamattarǵa shabýyl jasamaq bolǵan jas jigit ustaldy

AQTÓBE. QazAqparat - Aqtóbede qaltaly azamattarǵa shabýyl jasamaq bolǵan 25 jastaǵy kúdikti ustaldy. Odan qarý men esirtki zattary tárkilendi. Bul týraly oblystyq ІІD baspasóz qyzmetine silteme jasap QazAqparat tilshisi habarlaıdy.

Aqtóbe oblystyq ІІD Uıymdasqan qylmysqa qarsy kúres basqarmasy jedel-izdestirý jumystaryn júrgizdi. Aqtóbe qalasynyń 25 jastaǵy turǵynynan 16 kalıbrli ańshy myltyǵynyń uńǵysy, oq-dári men gazetke oralǵan marıhýana tabyldy. Keıin polıtsııa qyzmetkerleri mekenjaıyn anyqtap, úıinen qarý men dinı mazmundaǵy kitapsha, paraqshalar tárkiledi.

«Dindi jamylyp, saqal ósirip, ózine «Halıl» dep laqap at qoıǵan kúdiktiniń esirtki tutynatyny anyqtaldy. Ol Aqtóbeniń qaltaly azamattaryna shabýyl jasaý úshin jospar qurǵan. Qazirgi kezde Qylmystyq kodekstiń «Esirtki, psıhotroptyq zattarmen, sol tektestermen, prekýrsorlarmen ótkizý maqsatynsyz zańsyz jumys isteý», «Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý» baptary boıynsha is qozǵaldy. Tergeý júrip jatyr», - dep habarlaıdy oblystyq ІІD baspasóz qyzmeti.