Aqtóbede ıt talap óltirgen balanyń ólimine qatysty qylmystyq is toqtatyldy

AQTÓBE. QazAqparat – Aqtóbede 12 jastaǵy balany ıt talap óltirgeni sot-medıtsınalyq saraptama qorytyndysymen dáleldengen. Polıtsııa qaıǵyly oqıǵada qylmystyq quramnyń bolmaýyna baılanysty isti toqtatty, dep habarlaıdy QazAqparat tilshisi.

«2022 jyly 9 maýsym kúni saǵat 23:52-de «Eset batyr» turǵyn úı alabynyń úshinshi yqsham aýdanyndaǵy qurylys nysanynda 2010 jyly týǵan balanyń denesi tabyldy. Bala kóp qan joǵaltqan, bas, dene, aıaq-qoly jaraqattanǵan. Sot-medıtsınalyq saraptama nátıjesinde balanyń ólimi ıtterdiń talaǵanynan bolǵandyǵy anyqtaldy. Qylmystyq quqyqbuzýshylyq quramynyń bolmaýyna baılanysty is toqtatyldy», - dedi Aqtóbe oblysy PD Tergeý basqarmasy bastyǵynyń orynbasary Nurbolat Sultanov.

Eske salsaq, oqıǵa bolǵan kúni oblystyq polıtsııa departamenti kámelet jasqa tolmaǵan balanyń kóp qan joǵaltý, bastyń, deneniń, qol men aıaqtyń kóptegen jaraqattary túrindegi zorlyqpen ólý belgileri bar denesi tabylǵanyn habarlady. Keıin ıt talap óltirgen oqýshynyń ata-anasy, jaqyndary ıttiń ıesin taýyp, jazalaýdy surady. Al, oblys ákiminiń orynbasary Jaqsyǵalı Imanqulov baspasóz máslıhatynda qaraýsyz ıt pen mysyqtyń kózin joıý baǵytyndaǵy jumystar týraly baıandady. Sondaı-aq, jaǵdaıdyń qıyn bolyp turǵanyn aıtty. It sany kóbeımese, azaımaǵan. Ol osy jumysty atqara almadyń dese, qyzmetinen ketýge ázir ekenin málimdedi.

Aıta keteıik, bıyl oblysta ıt aýlaý jumystaryna 51 mln teńge bólingen.