Aqtóbede iri munaı urlyǵyna qatysty is boıynsha sot kúni belgilendi

AQTÓBE. QazAqparat - Munaı urlyǵy boıynsha Qazaqstan pen Belarýs azamattarynan quralǵan uıymdasqan qylmystyq toptyń ústinen qozǵalǵan is boıynsha basty sot talqylaýy belgilendi, dep habarlaıdy QazAqparat tilshisi.

Aqtóbe oblystyq qylmystyq ister jónindegi mamandandyrylǵan aýdanaralyq sotyna A. Qojaǵalıev, A.Kóshkinbaev, E.Ótenııazov, S.Raev jáne Belarýs azamaty S.Kýntsevıchke qatysty qylmystyq is túsken bolatyn.

Búgin oblystyq sottyń baspasóz qyzmeti basty sot talqylaýy 23 shildege belgilengenin habarlady.

«Munaı urlyǵymen aınalysqan uıymdasqan qylmystyq topqa qatysty istiń basty sot talqylaýy 23 shildege bekitildi. Aqtóbe oblystyq qylmystyq ister jónindegi mamandandyrylǵan aýdanaralyq sotynyń sýdıasy advokattar men sottalýshylardyń ótinish hatyn qaraýsyz qaldyrdy. Basty sot talqylaýyna deıin taraptar qylmystyq istiń materıaldarymen tolyq tanysa alady»,- dep habarlady oblystyq sottyń baspasóz qyzmetinen.

Aıta keteıik, 2016 jyly Aqtóbe oblysynda UQK, Memlekettik qyzmet isteri jáne sybaılas jemqorlyqqa qarsy kúres Ulttyq bıýrosy, ІІM zańsyz munaı tasymalyna qatysty arnaıy operatsııa uıymdastyryp, «Aktobe neftepererabotka» JShS-de tintý júrgizdi. Nátıjesinde kúdiktiler qamaýǵa alyndy. Olardyń arasynda Belarýs azamaty S.Kýntsevıch te bar.