Aqtóbede iri kásiporyndar aınalasyna shaǵyn jáne orta bıznesti damytý beldeýi qurylady

AQTÓBE. QazAqparat - Aqtóbe oblysynyń ákimi Eraly Toǵjanov iri kompanııalar aınalasyna shaǵyn jáne orta bıznesti shoǵyrlandyrýdy tapsyrdy, dep habarlaıdy QazAqparat tilshisi.

Hromtaý aýdanyna jumys saparymen barǵan Eraly Toǵjanov ken oryndaryn aralady.

Mundaǵy óndiristi, jalaqy máselesi men ujymdyq kelisimsharttyń oryndalýyn nazarǵa aldy.

«Qazirgi tańda óndiriste 7500 adam eńbek etedi. Kombınatta jylyna 4 mln hrom rýdasy óndiriledi. Kóp bóligi Aqsý men Aqtóbedegi ferroqorytpa zaýyttaryna jiberiledi»,- deıdi Dóń ken baıytý kombınatynyń dırektory Azamat Bektibaev.

Oblys ákimi shaǵyn jáne orta bıznes beldeýin tıimdi damytyp otyrǵan «Qazaqmys» AQ-n mysalǵa keltirdi.

«Barlyq iri kompanııa osy baǵyttaǵy júıeli jumysty júrgizýi kerek. Óz kásiporyndaryńyzdyń aınalasyndaǵy shaǵyn jáne orta bıznes beldeýin damytý boıynsha usynysty daıyndańyzdar. Bul shaǵyn jáne orta bıznesti damytýǵa, soǵan sáıkes halyq tabysynyń artýyna da túrtki bolady»,- dedi E.Toǵjanov.

Hrom rýdasyn óndiretin «Voshod orıel» JShS, sonymen qatar, 5 mln tonnaǵa deıin mys-myrysh rýdasyn óndirip, óńdeıtin, jylyna 60 myń tonna mys pen 45 myń tonna myrysh shyǵaratyn «Aqtóbe mys kompanııasy» JShS-ne da osyndaı mindet qoıyldy.

Budan bólek, oblys ákimi budan da joǵary dárejege qol jetkizý úshin óndiristi jańǵyrtý qajettigin atap ótti.

E.Toǵjanov: «Bul úlken ınvestıtsııany qajet etetin mindet. Men mamandardy shaqyrýǵa daıynmyn, eger esepteýler boıynsha kómek kerek bolsa, barlyq qajetti qoldaýdy kórsetemin. Búkil álem qazirdiń ózinde qaıta bólýdiń 5-6 deńgeıinde jumys istep jatyr. Biz úshin úshinshi deńgeıden ketetin ýaqyt keldi. Bárimiz de aqyrǵy óńdeýge umtylýymyz kerek»,- dep atap ótti.

Sondaı-aq oblys ákimi Hromtaý qalasyndaǵy problemalyq nysandardyń qurylysyn qarady.

Óńir basshysy birneshe jyldan beri Hromtaý qalasynyń 22-kvartal shaǵyn aýdanyndaǵy bes qabatty eki úıdi áli kúnge deıin salyp bitire almaı jatqan seriktestik jumysyn synǵa aldy.

Oblys basshylyǵynyń aldynda baıandama jasaǵan JShS ókili jaýapkershilikti jaldaǵan qosalqy merdigerge artqysy keldi.

«Basynda kelisimshartqa otyrǵan merdiger jaýapqa tartylady. Nysandy qatań baqylaýǵa alamyn. Siz 15 adam jumys isteıdi dep baıandap otyrsyz, negizinde alpys adam bolýy kerek! Óndiristik jumystardyń kestesin quryp, úılerdi qysqa merzim ishinde turǵyzyp bolyńyzdar. Jumysshylar sany kóbeısin. Sizderge qatysty materıaldar quqyq qorǵaý organdaryna jiberiletin bolady»,- dedi oblys basshysy.

Óńir basshysy áli salynyp jatqan dene shynyqtyrý-saýyqtyrý kesheninde de boldy. Bul nysan basynda «Qazhrom» TUK AQ-nyń demeýshilik jobasy dep jarııalanǵanymen, qarjy tapshylyǵy men qurylys materıaldarynyń qymbattaýyna baılanysty jumys toqtatyldy.

Endi nysandy bıýdjet qarjylandyrady. Oblys ákimi qurylys basqarmasyna keshendi aıaqtaý merzimine qatysty tapsyrma berdi.

Eraly Toǵjanov Hromtaýdy jaıaý aralap, aýla aýmaqtarynyń abattandyrylýymen, fýd-karta jobasymen tanysty, «Kenshiler» saıabaǵyn qarap shyqty da «Baldáýren» balalar keshenin jónge keltirýdi tapsyrdy.