Aqtóbede ınertti materıal óndirgen seriktestik 100-den astam jumysshyǵa qaryz

<p>AQTÓBE. KAZINFORM &ndash; Aqtóbe oblysy boıynsha jumysshylar aldyndaǵy qaryzy kóp &laquo;Mining Inert Materials&raquo; JShS bankrot dep tanylyp, búgindi is sotta qaralyp jatyr. Kompanııanyń jumysshylar aldyndaǵy qaryzy 30 mln teńgeden asady.</p>

Aqtóbe oblystyq eńbek ınspektsııasy basqarmasynyń basshysy Jandos Álimov óńirlik kommýnıkatsııalar qyzmetinde ótken jyldy qorytyndylap, aldaǵy josparymen bólisti. Byltyr oblys boıynsha 400-den astam tekserý júrgizilgen. Nátıjesinde 130 jumys berýshige 24 mln teńgeden astam aıyppul salyndy. 

- Sheteldik jumys kúshin tartý boıynsha tekserý de júrgizildi. Bul salada 40-tan astam zańbuzýshylyq anyqtaldy. Barlyǵy 6 ákimshilik jaza qoldanylyp, 2,7 mln teńge aıyppul salyndy. Aıta keterligi, oblysta sheshimin tappaı turǵan eńbek daýy joq. Byltyr «SNPS-Aqtóbemunaıgaz» AQ-nyń «Batys munaı» mekemesinde jalaqy daýyn kóterdi. Bul rettelgen jumys,- dedi Aqtóbe oblystyq eńbek ınspektsııasy basqarmasynyń basshysy Jandos Álimov. 

Aıta keteıik, byltyr 80 adam óndiristik jaraqat aldy. Onda 13 adam kóz jumdy. Kóbi taý-ken, munaı-gaz salasynda tirkeldi. Óndiristik oqıǵalarǵa qatysty arnaıy tekserý júrgizilip, 73 tulǵaǵa qatysty is polıtsııaǵa tapsyryldy. 

- Byltyr 8 mekeme óz jumysshylaryna 72,8 mln teńge qaryz boldy. Qazir kezde tek bir is qaldy. Ol - «Mining Inert Materials» JShS-i. Bul kompanııa 138 jumysshysyna 31,6 mln teńge qaryz. Qazir bankrottyq dep taný jumysy júrip jatyr. Zań boıynsha múlki satylyp, birinshi jumysshylardyń qaryzy óteledi,- Jandos Álimov.