Aqtóbede hımııa zaýytynyń ornyn tazartý jobasy 7 jylǵa sozylyp ketti

<p>AQTÓBE. KAZINFORM &ndash; Aqtóbe hımııa zaýytynyń ornyn tazartýǵa arnalǵan jobalyq-sematalyq qujatqa bıyl túzetýler engizilýi tıis. Al tazartý jumysy úshin qarjy respýblıkalyq bıýdjetten bólinýi múmkin.</p>

Aqtóbe oblysy Alǵa aýdanyndaǵy hımııa zaýytynyń qaldyǵy qazirgi kezde Elek ózenin lastap tur. Zaýyt ornyndaǵy qaldyqqy tazartý, zararsyzdandyrý jumystary úshin alǵashqy jobalyq-smetalyq qujat 2017 jyly jasala bastady. Biraq áli kúnge deıin bekitilmedi.

«2017 jyly jobalyq-smetalyq qujat jasala bastady. Alaıda oblystaǵy qoǵamdyq uıymdar men belsendiler arasynda kóp suraq týyndap, memlekettik saraptama qorytyndysy sotta qaraldy. Joǵary sot aryzdy keri qaıtarǵanymen, arada 3 jyl ótip ketti. Sóıtip jobalyq-smetalyq qujat eskirip qaldy. Ekologtar kótergen keıbir suraq oryndy dep tanyldy. 2024 jyly osy jobaǵa qaıta túzetý engiziledi. Bul jumys respýblıkalyq bıýdjetten jergilikti bıýdjetke berildi. Eskisindegi kemshilik – túgendeý jumysy durys júrgizilmegen. Keıbir qaldyq esepke alynbaǵan. Bıyl qoǵamdyq uıymdar, ǵalymdar jáne sonda jumys istegen adamdarmen birge jańa qujat daıyndaǵymyz keledi. Jerasty ınfraqurylymy da eskerilýi tıis. Joba jergilikti, al zararsyzdandyrý jumysy respýblıkalyq bıýdjet esebinen júrgiziledi», - dedi Aqtóbe oblystyq Ekologııa departamentiniń basshysy Erbol Qýanov.

Eske salsaq, Aqtóbeniń Alǵa qalasynda S.Kırov atyndaǵy hımııa zaýyty boldy. Munda myńdaǵan adam jumys istep, óndiris orny 90 jyldardyń sońyna deıin saqtaldy.

Bankrot bolǵan kompanııanyń qazir qańyraǵan nysandary ǵana qaldy. Bári ýly, zııandy bolǵan soń ony kómip, zalalsyzdandyrý qajet. 2017 jylǵy málimetke súıensek, Alǵa hımııalyq zaýytynyń ornyn zalalsyzdandyrýǵa 7 mıllıard teńge qajet.