Aqtóbede ferroqorytpa zaýytynyń bes jumysshysyn kúıik shaldy

<p>AQTÓBE. KAZINFORM &ndash; Aqtóbe ferroqorytpa zaýytynyń 5 jumysshysyn kúıik shaldy. Olar kópsalaly oblystyq aýrýhananyń travmatologııa bólimine jetkizildi.</p>

Aqtóbe oblystyq densaýlyq saqtaý basqarmasynyń habarlaýynsha, oqıǵa búgin saǵat shamamen 16:02–de tirkeldi. 103 baılanys nómirine Aqtóbe ferroqorytpa zaýytynyń medıtsına qyzmetkerlerinen shaqyrý tústi. Onda birden eki brıgada bardy. Sonymen birge oblystyq TJD jáne Apattar medıtsınasy ortalyǵyna habar berildi. 

— Búgin saǵat 16:10–da jedel járdem brıgadasy kómek kórsetti. 42 jastaǵy jumysshy termııalyq kúıik alǵan. Onyń beti men qolynda kúıik bar. Oǵan aýyrsynýdy basatyn dári berildi. Keıin oblystyq kópsalaly aýrýhanaǵa jetkizildi. Sonymen birge taǵy 4 jumysshyda kúıik bar. Olardyń zaýyttyń medıtsına qyzmetkerleri aýrýhanaǵa jetkizdi. Barlyq naýqastar tekserildi. Jumysshylardyń kúıik deńgeıi 5%-13% quraıdy. Jaǵdaıy ortasha aýyr, - dep habarlady Aqtóbe oblystyq densaýlyq saqtaý basqarmasynyń baspasóz qyzmeti. 

Aıta keteıik, jedel járdem kóligimen aýrýhanaǵa jetkizilgen naýqas emdeý ornyna jatýdan bas tartty. Oǵan turǵylyqty jeri boıynsha qaralyp, em qabyldaýǵa keńes berildi. 

— Aqtóbe ferroqorytpa zaýytynda koks shańyn túsirý kezinde qalpyna keltirgishtiń (redýktor) shańy qysqa merzimge tutandy. Saldarynan 5 qyzmetker, onyń ishinde merdiger uıymdardyń eki qyzmetkerin 5-ten 13 paıyzǵa deıin kúıik shaldy. Zardap shekkender oblystyq aýrýhanaǵa jetkizildi. Al tórteýi aýrýhanaǵa jatqyzyldy. Oqys oqıǵa týraly memlekettik organdarǵa habarlanyp, mán-jaıy anyqtalyp jatyr. Kompanııa qyzmetkerge barlyq qajetti kómekti kórsetedi, - dep habarlady AFZ-nyń baspasóz qyzmeti.