Aqtóbede esirtki taratýmen aınalysqan erli-zaıypty 11 jylǵa sottaldy

ASTANA. QazAqparat - Aqtóbede esirtki taratýmen aınalysqan erli-zaıypty 11 jylǵa sottaldy, – dep habarlaıdy Polisia.kz saıtyna silteme jasap.

Ótken jyldyń sońynda Aqtóbe oblysy polıtsııa departamentiniń esirtki qylmysyna qarsy is-qımyl basqarmasynyń qyzmetkerleri arnaıy jasaqpen birlesip maqsatty jedel-izdestirý sharalaryn júrgizý barysynda Aqtóbe qalasynda 27 jastaǵy áıel men 40 jastaǵy er azamatty ustady.

Medıtsınalyq kýálandyrý qorytyndysyna sáıkes, erli-zaıyptylardyń ekeýi de esirtkige mas bolǵan. Olardy jeke tintý, turǵylyqty jerin jáne esirtki qoıǵan jerlerin tintý barysynda jalpy salmaǵy 1,5 kelini quraıtyn sıntetıkalyq psıhotroptyq zattar tárkilendi. Bul derekter boıynsha Qazaqstan Respýblıkasy Qylmystyq kodeksiniń 297-babynyń 3-bóligi boıynsha qylmystyq is qozǵaldy.

2023 jyldyń mamyr aıynda Aqtóbe qalasynyń qylmystyq ister jónindegi mamandandyrylǵan aýdanaralyq sotynyń sheshimimen erli-zaıyptylar satý maqsatynda asa iri kólemde psıhotroptyq zattardy saqtaǵany men tasymaldaǵany úshin kináli dep tanylyp, 11 jylǵa bas bostandyǵynan aıyryldy.