Aqtóbede Eset batyr kesenesiniń janyna monýment salynyp jatyr
Aqtóbe oblysy, Alǵa aýdany, Bestamaq aýylyndaǵy Eset batyr kesheni jańartylýda. «Týǵan jerge taǵzym» aktsııasy aıasynda kásipker 32 mıllıon teńge bólip, bıiktigi 11,5 metr bolatyn monýment salynyp jatyr. Birneshe aptadan soń qurylys jumystary aıaqtalady.
«Eset batyr monýmenti men ózge de ilespe jumystardy 10 qazanǵa deıin bitirýi qajet. Óıtkeni kúzde biz qazaq qolbasshysynyń 350 jyldyq mereıtoıyn atap ótýdi josparlap otyrmyz»,- dedi oblys ákimi Berdibek Saparbaev.
Aıta keteıik, Eset batyr kesheninde kesene, murajaı men adamdarǵa qyzmet kórsetetin ashana bar. Kesene 1992 jyly salyndy. Bıyl óńirde batyrdyń 350 jyldyǵy ótedi. Eset batyrǵa arnap Aqtóbe qalasynda eskertkish ornatý josparlanǵan. Sonymen qatar, óńirde Eset batyr atyndaǵy sportta daryndy balalarǵa arnalǵan mektep-ınternattyń jańa ǵımarattary iske qosylady. Ári 22-23 qyrkúıekte «Qasıetti Qazaqstan» jobasy aıasynda ǵalymdardyń qatysýymeen «XVII-XVIII ǵǵ. qazaq-jońǵar qaqtyǵystaryndaǵy halyq batyrlarynyń róli: qazaq biregeıliginiń qalyptasýy» atty respýblıkalyq ǵylymı-praktıkalyq konferentsııa ótedi.