Aqtóbede erli-zaıyptylar múgedek arbasyna tańylǵan adamdy qaıyr suraýǵa májbúrlep kelgen
«Aqtóbe qalasynda polıtsııa qyzmetkerleri eriktilermen birlesip qaıyr suraýǵa májbúrleý faktisin anyqtady. Aqpan aıynda erli-zaıyptylar 46 jastaǵy múgedek arbaǵa tańylǵan er adamdy Shymkentten Aqtóbege ákelip, qorqytyp jáne zorlyq-zombylyq jasaý arqyly qaıyr suraýǵa májbúrlegeni belgili boldy», - dedi Іshki ister mınıstrliginiń ókili Shuǵyla Turlybek onlaın brıfıngide
Kúdiktiler múgedekti kún saıyn tańerteńnen keshke deıin bazarlardyń mańynda, al juma kúnderi meshitterdiń janynda ustaǵan.
Osy arqyly kúnine 5-6 myń teńge jınap otyrǵan. Al túsken aqshany túgeldeı ózderi ıemdenip kelgen.
«Osy fakti boıynsha Qylmystyq kodestiń 128-baby 1-bóligi boıynsha sotqa deıingi tergeý bastaldy. Jábirlenýshi daǵdarys ortalyǵyna ornalastyryldy», - dedi Shuǵyla Turlybek.