Aqtóbede erekshe gaz quıý stantsııasy iske qosyldy

AQTÓBE. QazAqparat - Aqtóbede gaz stantsııasy iske qosyldy. Eýro-5 halyqaralyq standartyna saı keletin metan gazy 83 gradýsqa deıin qatpaıdy, dep habarlaıdy QazAqparat tilshisi.

Aqtóbede erekshe gaz quıý stantsııasy óz jumysyn bastady. Qubyr arqyly kelip jatqan tabıǵı gaz tazartylyp, kólikterge quıylady. Jospar boıynsha gaz beketi úzdiksiz, demalyssyz jumys isteıdi. Ári shıkizat tapshylyǵy bolmaıdy.

«Aqtóbede metan stantsııasy ashyldy. Artyqshylyǵy - ekologııalyq taza, kólikterden zııandy gaz bólinbeıdi. Ári qoǵamdyq kólikterdegi jolaqy baǵasyn turaqty ustap turýǵa septigin tıgizedi. Qazir janar-jaǵarmaı baǵasy, suıytylǵan gaz quny ártúrli. Benzın ósip turady. Al metannyń baǵasy ózgermeıdi. Sebebi, metan tabıǵı gazdan alynady. Stantsııada syǵymdalyp, tazartylady»,- dedi «QazTransGaz Ónimderi» JShS departamenti dırektorynyń orynbasary Saǵymjaı Qudaıbergenov.

Shaǵyn zaýyt magıstraldi qubyrdan gaz alyp otyr. Keptirilip, tazartylyp, syǵymdalady. Qazirgi lıteri 60 teńgege satylyp jatyr.

Aıta keteıik, kólikter men qoǵamdyq avtobýstar metanmen júrýi úshin arnaıy qondyrǵy qajet. Qazirgi kezde reseılik kompanııa jańa qurylǵylardy qondyrý úshin óz qyzmetin usyndy. Bul qyzmet jeńil kólikterge 350 myń teńge, al avtobýstar úshin 650 myń teńge bolady. Al jergilikti ákimdik avtoparkterdegi qoǵamdyq kólikterdi metan gazyna aýystyrý jumysyn bastady. Jospar boıynsha kelesi jyly 200 avtobýs metan gazymen júredi. Al stantsııa kúnine 400 kólikke qyzmet kórsete alady.