Aqtóbede er adamdar áıeliniń denesine iz qaldyrmaı urady
Aqtóbede otbasyndaǵy zorlyq-zorbylyq ártúrli sıpat ala bastady. Aqtóbe qalalyq áıelderdi qoldaý ortalyǵy jyl basynan beri 31 názik jandyǵa kómektesken. Olardyń teń jartysy qatty zábir kórip, zańdy túrdi óz quqyqtaryn qorǵaı almaı otyr.
«Aqtóbede otbasyndaǵy zorlyq-zombylyq jıilep ketti. Zorlyq-zombylyq otbasynyń áleýmettik jaǵdaıyna, erli-zaıyptynyń ómir súrý zańdylyǵyna múlde qaramaıdy. Nege ekenin túsinbedik? Tipti syrt kózge úlgili bolyp kóringen otbasynda da áıeldi uryp-soǵý, psıhologııalyq qysym kórsetý kezdesedi. Sońǵy kezderi er adamdar áıelderiniń denesine iz qaldyrmaı uratyn ádisti qoldanyp júr. Olar bul ádisti jetik meńgergen eken. Ony balalar kóredi, qaıǵyrady»,- dedi qalalyq áıelderdi qoldaý ortalyǵynyń tóraıymy Aıgúl Dúısenova.
Aqtóbelik mamandar erli-zaıypty ajyrasqan kezde áıelder óz quqyǵyn qorǵaı almaıtynyn aıtyp otyr. Óıtkeni birge úı salyp, onyń ıesi er adamnyń ata-anasy nemese baýyry bolsa, áıel zań boıynsha úlesin talap ete almaıdy. Kóbine názik jandylar baspanasyz, tabyssyz qalady.
«Júkti áıeline atynan nesıe alyp, keıin ony úıinen qýyp jiberetin er adamdar da kezdesedi. Tipti «alıment talap etseń nesıe tóleýge kómektespeımin» dep bospalaıdy. Sondyqtan balalardy otbasylyq ómirge beıimdep, jasóspirim shaqta túsindirý jumystaryn júrgizý qajet. Trenıngter ótkizý artyq bolmas. Kóbine eki otbasynyń ómir súrý zańdylyǵy eki bólek bolyp, jastar kelispeı, ajyrasyp jatady. Olardyń ata-analary arazdasqan eki jasty qaıta tatýlastyrýdy oılamaıdy, kerisinshe «balany ózimiz baǵamyz» dep qoldap otyrady. Sol aralyqta bala tolyq emes otbasynda ósedi»,-dedi Aıgúl Dúısenova.