Aqtóbede epıdemıologııalyq jaǵdaı turaqtalyp keledi
Aqtóbe oblysynyń ákimi Ońdasyn Orazalın Aqtóbe medıtsınalyq ortalyǵynda bolyp, dárigerlermen tildesti, naýqastardyń jaǵdaıymen tanysty. Oblystyq densaýlyq saqtaý basqarmasynyń basshysy Rústem Isaevtiń aıtýynsha, búgin oblys COVID-19-dyń taralýy boıynsha «sary» aımaqqa ótti.
«Epıdemıologııalyq jaǵdaı baqylaýda. Naýqastar sany azaıyp keledi. Kún saıyn az adam tirkeımiz. Búginde reanımatsııalyq bólimde koronavırýspen aýyryp jatqan 20 naýqas bar. COVID-19-ben aýyryp qalǵan júkti áıelder de azaıdy. Oblys boıynsha 12 naýqas statsıonarda emdelip jatyr. Jaǵdaılary – qanaǵattanarlyq. Oblystaǵy barlyq emdeý mekemeleri qalypty tártipte jumys jasap keledi»,- dedi R.Isaev.
Ońdasyn Orazalın dárigerlerdiń jumys jaǵdaıyna qyzyǵýshylyq tanytty. «Keıde jumys óte qıyn bolady, alaıda bizdi memlekettiń qoldaıtyny qýantady. Barlyq bólimdegi qyzmetkerlerdiń, sonyń ishinde kishi medıtsına qyzmetkerleriniń de eńbekaqysy qańtar aıynda ósti. Máselen, men 8 saǵattyq jumys kúni men kezekshilikti qosqanda 380-400 myń teńge alamyn. Bizde meıirger bolyp negizinde ınternder, ıaǵnı medıtsınalyq ýnıversıtettiń 6, 7 kýrs stýdentteri jumys isteıdi. Qazir olar onlaın oqyp jatyr. Sondyqtan táýliktik kezekshilikke shyǵa alady. Aıyna 10 táýlik kezekshilik etedi, qalǵan ýaqytta sabaqta. 180 myń teńgedeı jalaqy alady»,- deıdi Aqtóbe medıtsına ortalyǵynyń bólim meńgerýshisi Aıgerim Túkibaeva.
Aıta keteıik, ótken táýlikte óńirde 47 adamnan koronavırýs ınfektsııasy anyqtalǵan. Onyń 35-i derttiń sımptomdy túrine shaldyǵyp otyr. Qazirgi kezde úı karantınindegi adam sany da birshama azaıǵan. Barlyǵy 3700-den aqtóbelik oqshaýlanyp otyr.