Aqtóbede Elek jáne Qarǵaly ózenderi qaıta kóterilip jatyr

<p>AQTÓBE. KAZINFORM &ndash; Aqtóbe qalasynda Elek jáne Qarǵaly ózenderi kóterilip jatyr. Tótenshe jaǵdaılar departamenti qajet bolǵan jaǵdaıda 112 jáne 109 baılanys nómirlerine qońyraý shalýdy surady.</p>

Aqtóbe qalasynda qazirgi kezde qaýip áli seıilgen joq. Oblystyq TJD áýeden baqylaý kezinde Qarǵaly ózeni basseıninde qar áli de bar ekenin anyqtady. Sonymen birge Elek ózeni boıynsha arnalary men oıpattarda qar erip, sý júrip jatqany belgili boldy.

- Elek pen Qarǵaly ózenderi jaǵasynda ornalasqan úılerge áli qaýip bar. Al oblystaǵy aýdandarda jaǵdaı turaqty. Sý sorý, qum toly qap tóseý, jaǵany bekitý jumysy jalǵasady. QR Qorǵanys mınıstrliginiń tikushaqtarymen gýmanıtarlyq kómek te kórsetip jatyr. Óńirde 760-tan astam úıge sý kirgen. Sonymen birge 13 áleýmettik nysan búlindi. Onyń tórteýi qalada, ózgesi Qobda aýdanynda. Baý-baqsha ujymdarynda sý kirgen úıler sany bolsa 200-ge jýyqtap qaldy. Evakýatsııalanǵan adamdar sany 9 myńǵa jýyqtady,- dedi Aqtóbe oblystyq TJD tótenshe jaǵdaılardyń aldyn alý bóliminiń bas mamany Álisher Sarbaev.

Aıta keteıik, Aqtóbe oblysy Oıyl aýdanynda qazir múlde jol joq. Aýdan aýyldarymen qosa sý qorshaýynda qalyp qoıǵan. Sondyqtan munda kómek tek qaıyqpen nemese tikushaqpen jetkizilip jatyr.

Foto: Altynaı Saǵyndyqova

- Qazirgi kezde Aqtóbe oblysy terrıtorııasynyń 19% qar jatyr. Olar: Mártók, Qarǵaly, Hromtaý, Áıteke bı aýdandarynda. Óńirdiń kóp bóliginde qar erip ketken soń, tasqyn kezeńiniń sharyqtaý shegi artta qaldy desek te bolady. Degenmen áli de qarǵyn sý kelip jatyr,- dedi Aqtóbe oblystyq TJD bóliminiń bastyǵy Taras Kovalenko.

Eske salsaq, keshe túnde Sazdy men Jińishke ózenderiniń sýy kóterilip, turǵyndar evakýatsııalyq pýnktterge jetkizildi.