Aqtóbede eki paıyzdyq ıpoteka 1 myń muqtaj otbasyna beriledi
Aqtóbede turǵyn úı sharýashylyǵy bóliminde kezekte turǵan otbasylar bıyl 2 paıyzdyq ústemeaqymen páter ala alady. Olardyń qatarynda kópbalaly, tolyq emes jáne múgedek bala baǵyp otyrǵan otbasylar bar. Bul sanattaǵy azamattar Turǵyn úı qurylys jınaq bankinen 2 paıyzben ıpoteka ala alady.
«Kópbalaly jáne áleýmettik az qamtylǵan otbasylardy baspanaman qamtamasyz etý úshin bıyl «Baqytty otbasy» baǵdarlamasy boıynsha jumystar júzege asyrylady. Ony júzege asyrý úshin Turǵyn úı qurylys jınaq bankine aldaǵy úsh jylda 150 mıllıard teńge qarjy bólinedi. Baǵdarlama sharty boıynsha turǵyn úıdiń baǵasy 15 mıllıon teńgeden aspaýy kerek. Bastapqy jarna - 10 paıyz. Jyldyq 2 paıyzben turǵyn úı zaemy beriledi. Bul jaǵdaıda úmitker jergilikti atqarýshy organdar tarapynan beriletin turǵyn úı sertıfıkatyn paıdalana alady. Baǵdarlamaǵa 4 jáne odan da kópbalaly otbasylar, múgedek bala baǵyp otyrǵan jáne kámelet jasqa tolmaǵan balasy bar tolyq emes otbasylar qatysa alady. Olardyń atynda baspana tirkelmegen bolýy shart. Bir eskerte ketetinini - bul baǵdarlamaǵa qatysýshylardy jergilikti atqarýshy bılik anyqtaıdy», - deıdi «Turǵyn úı qurylys jınaq banki» AQ Aqtóbe oblystyq fılıaly bıznesti damytý bóliminiń basshysy Nurlan Balǵojıev.
Talap boıynsha otbasynyń tabysy ár múshesine shaqqanda eń tómengi aılyq kórsetkishten az bolýy tıis. Nesıe 18 jylǵa beriledi. Máselen, páter quny 10 mıllıon teńge turatyn bolsa, jyldyq 2 paıyzben nesıe alý úshin bastapqy 10 paıyzyn tóleý kerek. Sodan soń alǵashqy 8 jylda otbasy aı saıyn 52,3 myń teńge, sodan keıin 11 jylda 36 myń teńge kóleminde nesıe tóleıtin bolady.