Aqtóbede eki bala ýlanyp, aýyr jaǵdaıda aýrýhanaǵa jatqyzyldy
Oqıǵa 18 tamyz kúni tirkelgen. Saǵat 23:00 shamasynda Qobda aýdanynyń ortalyq aýrýhanasyna «belgisiz zattan ýlaný» dıagnozymen 3 jáne 5 jastaǵy eki bala jetkizildi. Janynda feldsher men anasy, ájesi bolǵan.
«Bes jastaǵy uldyń jaǵdaıy aýyr. Sandyraqtap jatty. Sonymen birge úsh jastaǵy qyzdyń da jaǵdaıy aýyr, álsiz kúıinde jetkizildi. Olardyń dene qyzýy joǵary boldy. Týystarynyń aıtýynsha, qyzýy kóterilip, sandyraqtap, álsireı bergen. Jan-jaqty suraq-jaýap kezinde sadaqa bolyp, balalardyń aýylda oınap júrgeni anyqtaldy. Olar saǵat shamamen 18:00 úıge kelgen. Aýyrǵan soń feldsher shaqyrdy. Ózderi paratsetamol berip, qyzýyn túsirmek boldy. Alǵashqy kezde neden ýlanǵany belgisiz edi. Keıin aýylda ıtjıdek ósetini anyqtaldy», - dep habarlady oblystyq densaýlyq saqtaý basqarmasynyń basshysy Rústem Isaev.
Aıta keteıik, balalardy reanımatologtar qarap shyqty. Túrli synama alyndy. Medıtsınalyq avıatsııaǵa habar berilip, dárigerler keńes ótkizdi.
«Qazirgi kezde balalardyń dene qyzýy sál tómen tústi. Búgin tańǵy saǵat 03:00 shamasynda elitip, qaıta sandyraqtaı bastaǵan. Bir saǵattan soń medavıatsııa, onyń ishinde reanımatolog bardy. Ekeýi de Ana men bala ortalyǵyna jetkizildi. Reanımatologtar respýblıkalyq áriptesterimen aqyldasty. Qazir balalardyń jaǵdaıy aýyr. Qaıta-qaıta sandyraqtap ketedi. Ýdyń betin qaıtaratyn em alyp jatyr», - dedi Rústem Isaev.