Aqtóbede eki kompanııa joq qubyrdy ózara satyp alǵan

<p>AQTÓBE. KAZINFORM — Aqtóbede munaı kompanııasy tehnıka men qural-jabdyqtar satatyn JShS-pen kelisimge kelip, joq qubyrdy satyp, satyp alǵan. Eki aradaǵy kelisim somasy 43 mln teńge boldy. Sot bul kelisimsharttyń kúshin joıdy.</p>

Eki kompanııa arasyndaǵy quıtyrqy isti salyq organdary anyqtap, keıin tekserý júrgizedi.

Іs materıalyna súıensek, sheteldik munaı kompanııasy tehnıkalar men qural-jabdyqtardy kóterme baǵada satýmen aınalysatyn iri kompanııamen ýaǵdalasyp, qubyr jetkizýge kelisedi. Eki aradaǵy kelisimshartta 43 mln teńge kórsetilgen. 

Tipti shot-faktýra bar. Jetkizýshige qosymsha qun salyǵyna 5 mln teńge de aýdarylǵan. 

— Jetkizýshide taýar bolmaǵan. Sondyqtan qarjylyq-sharýashylyq operatsııalardy júzege asyrý múmkin emes. Osy úshin memlekettik organ olardyń ústinen sotqa shaǵymdandy. Birinshi satydaǵy sot mámile taraptar arasynda bir de bir sharýashylyq operatsııa jasalmaǵanyn anyqtady. Qujat salyq júktemesin azaıtý maqsatynda resimdelgen, jasandy túrde jasalǵan. Talap qoıý qanaǵattandyryldy, shart jaramsyz dep tanyldy, — dep habarlady QR Joǵarǵy Sotynyń baspasóz qyzmeti. 

Alaıda apellıatsııa shaǵym qanaǵattandyrýsyz qaldyrylyp, bul sheshimniń kúshi joıyldy. Salyq organy bolsa sheshimge kelispeı, kassatsııalyq tártipte shaǵym túsirdi.

Joǵarǵy sottyń azamattyq ister jónindegi sot alqasy isti qarap shyqty. Sóıtip jabdyqtaýshylardyń memlekettik tirkeý jáne qaıta tirkeý qujaty joıyldy. Satýshy kompanııanyń taýardy tasymaldaıtyn kóligi, arnaıy tehnıkasy men qoımasy da bolmaǵany anyqtaldy.

Joǵarǵy sot daýdyń búkil mán-jaıyn tolyǵymen baǵalaı otyryp, birinshi satydaǵy sottyń sheshimin zańdy jáne negizdi dep tanydy.

Eske salsaq, «SNPS-Aktóbemunaıgaz» AQ suıytylǵan gaz tasymaldaýshylardan aldyn ala tólem talap etken. Bul buzýshylyqty Básekelestikti qorǵaý jáne damytý agenttiginiń Aqtóbe oblysy boıynsha departamenti tekserý kezinde anyqtady.