Aqtóbede Dımashtyń qytaılyq jankúıerlerine arnalǵan týrıstik marshrýt jasalýda

AQTÓBE. QazAqparat - Aqtóbede Dımash Qudaıbergenniń qytaılyq jankúıerlerine arnalǵan týrıstik marshrýttar jasalyp jatyr, dep habarlady «QazAqparat» HAA tilshisi.

Bul jaıly «Aqtóbe aqparat» ortalyǵyndaǵy baspasóz máslıhatynda syrtqy baılanystar jáne týrızm oblystyq basqarmasynyń basshysy Ermek Kenjehanuly habarlady.

27 maýsym kúni Astanada Qytaıdaǵy án baıqaýyna qatysyp, esimi keńinen tanylǵan Dımash Qudaıbergenniń shyǵarmashylyq keshi josparlanǵan. Aspan asty eliniń jankúıerleri kontsertke kelip qana qoımaı, Dımashtyń týǵan ólkesimen, onyń úıimen jáne otbasymen tanysqysy keledi.  Osyǵan baılanysty týrıstik kompanııalar arnaıy marshrýt uıymdastyrady.

Eske salaıyq, Syrtqy baılanys jáne týrızm oblystyq basqarmasynyń basshysy Ermek Kenjehanuly QazAqparat tilshisine bergen suhbatynda óńirge aldyn-ala esep boıynsha, 2 myńnan astam qytaılyq kelip, ánshiniń týǵan jerimen tanysatyndyǵyn aıtqan bolatyn.

Týrıster Dımashtyń otbasymen de kezdesý múmkindigin alady.

«Ata-anasymen, otbasymen kezdesý bolady. Mindetti túrde Qanat-Sveta Aıtbaevtardyń oıyn bilip, bul sharýany birlese atqaramyz. Sebebi, Dımashty olardan artyq eshkim bilmeıdi»,- dep atap ótti basqarma basshysy.

Sheteldikterdi ánshiniń týǵan jerimen, otbasymen tanystyrý úshin arnaıy gıdter de daıyndalyp jatyr.

«Qazir 2-3 gıd daıyn. Olar qytaı tilin biledi. Bizge Astanadan da habarlasty. Jınalys kezinde aıtylǵan aqparattan soń «qytaı tilin bilemiz, kómek kerek bolsa kelýge daıynbyz» degen adamdar boldy», - dedi Ermek Kenjehanuly.