Aqtóbede Dımash Qudaıbergenniń fan-aımaǵy ashylady
Aqtóbe oblysynda bıyl tehnopark ashylady. Sonymen birge, osy aıda Kreatıvti ortalyq jumysyn bastaıdy. Mundaı ortalyq qalanyń bes aımaǵynda ashylady.
«Krevtıvti ortalyq úzilissiz jumys isteıdi. Onyń ishinde álemniń jaryq juldyzy, elimizdiń maqtanyshy Dımash Qudaıbergenge arnalǵan fan-aımaq uıymdastyrylyp, shyǵarmashyl jastar qoldaýǵa ıe bolady. Frılanser, tıktoker salasyn meńgergen jastarǵa jol ashylady», - dedi oblystyq ishki saıasat basqarmasy basshysynyń orynbasary Serik Qonaqbaev.
Aıta keteıik, óńirde jastardyń sany 285 myńnan asady. Jastardy baspana, jumys, sapaly bilim men jańa bastamalardy qoldaý jaǵy alańdatady. Ótken jyly olardy baspanamen qamtý maqsatynda Otbasy bank pen ákimdik «Aqtóbe jastary» baǵdarlamasyn iske asyra bastady. Barlyǵy 600 mln teńge bólindi. Qazirgi kezde qujat qabyldanyp jatyr. Al, jumyssyzdyq deńgeıi 2,7% boldy. Eńbek maýsymynda 4 506 jas jumyspen qamtyldy. 2021-2022 oqý jyldary joǵary oqý ornyn bitirgen 6 124 túlektiń jumysqa ornalasý kórsetkishi – 72%.
«Ulybrıtanııanyń áıgili Herıot-Ýatt ýnıversıteti Jubanov ýnıversıtetiniń bazasynda tehnıkalyq mamandyqtar boıynsha magıstratýra baǵdarlamasyn ashady. Óńirdegi joǵary oqý oryndarynda 4 580 orynǵa arnalǵan 12, kolledjderde 3 970 orynǵa arnalǵan 27 jataqhana bar. Stýdentterdiń jataqhanaǵa suranysy tolyǵymen qanaǵattandyryldy», - dedi Serik Qonaqbaev.
Aqtóbede talantty jastardy qoldaý maqsatynda «Táýelsizdik urpaqtary» jobasy uıymdastyryldy. Oblys jastary «Bilim jáne ǵylym», «Mádenıet jáne óner», «Bıznes jáne kásip», «Medıa», «Aqparattyq tehnologııalar», «Volonterlik» baǵyttary boıynsha 103 joba tanystyryldy. Jobalardyń ishinde 30 jeńimpaz úzdik dep tanylyp, 300 myń teńge kóleminde grantqa ıe boldy.