Aqtóbede dárigerdi zorlap, denesine 24 ret pyshaq suqqan qylmyskerge sot úkimi shyqty
Aqtóbe medıtsına ortalyǵynyń dárigerine qatysty is jabyq qaralady. Kúdiktige Qylmystyq kodekstiń tórt baby boıynsha aıyp taǵyldy. Olar: «Turǵynjaıǵa qolsuǵylmaýshylyqty buzý»,«Zorlaý», «Adam óltirý», «Quqyq qorǵaý organy, arnaýly memlekettik organ qyzmetkeriniń, áskerı qyzmetshiniń ómirine qolsuǵýshylyq» baptary.
Sýdıa Nurlan Baqtyǵalıev tórt bap boıynsha túpkilikti 22 jyl bas bostandyǵynan aıyrý jazasyn taǵaıyndady. Sottalýshy jazasyn qylmystyq atqarý júıesiniń ortasha qaýipsiz mekemesinde óteıdi.
– Sot sottalýshynyń kinási tolyq dáleldendi dep esepteıdi. Qylmysty jasyrý úshin Tormarovany qasaqana óltirgen. Kúsh qoldanyp, zorlaǵan. Turǵynjaıǵa túnde kirgen. Oqıǵa ornynan balkon arqyly qashyp shyǵyp, polıtsııa qyzmetkerin jaraqattap, qashyp ketken. Sotta tolyǵymen dáleldendi. Ol páterge kirgenin, pyshaqtap óltirgenin moıyndap otyr. 2017 jyldan bastap tanystyqtary bastalǵan. Osy kezge deıin tanysyp, sóılesip júrgen. Sońǵy kezderi Tomarova qashqaqtaı bastaǵan, syılyqtaryn qaıtaryp bergen. Toqtatpaǵan soń polıtsııaǵa aryz jazyp, qorǵaý nusqamasy berilgen. Ákimshilik quqyqbuzýshylyq kodekstiń 461 baby boıynsha jaýapqa tartylǵan. Bul jerde sot daıyndalyp bardy degen aıypty negizdi dep tanydy. Túngi ýaqytta, saǵat 4:00-de eshkim bolmaǵanyn kútip barǵan. Arnaıy saty aparǵan, óz kóligimen emes, basqa kólik jaldaǵan. Іshke kirip, zorlap, sony jasyrý úshin óltirgen. Sot buryn sottalmaǵanyn eskerdi. Aýyrlatatyn mán-jaı anyqtalmady, - dedi sýdıa Nurlan Baqtyǵalıev.
Sottalýshy úkim oqylǵan soń apellıatsııalyq shaǵym túsiretinin aıtty. Qaza bolǵan Tomarovanyń ákesi jaza jeńil dep otyr.
– Qyzymmen túnde sóılesip, ol aýylǵa qaıtatynyn, poıyzdan kútip alýymdy surady. Tańda baqılyq bolǵanyn estidim. Sot úkimine kóńilim tolmady. Men ómir boıy bas bostandyǵynan aıyrýdy suradym. Asa aýyr qylmys jasap otyr. 24 ret pyshaqtaǵan. Keshirim bermedik. Eń kem degende 25 jyl berýi kerek edi, - dedi qaıtys bolǵan dárigerdiń ákesi Qaldybaı Tomarov.
Sottalýshynyń qorǵaýshysy Gúlnara Óteýova kóp mán-jaı nazardan tys qalǵanyn, tergeý kezinde kórsetilmegenin aıtyp, apellıatsııalyq shaǵym túsiretinin jetkizdi. Sot jábirlenýshi taraptyń azamattyq talap aryzyn qanaǵattandyrdy. Sottalýshydan 20 mln teńge moraldyq, 800 myń teńge zań kómeginiń shyǵyny, 1,2 mln teńge materıaldyq shyǵyn óndiriledi.
Aıta keteıik, qylmystyq iste zorlaý baby boıynsha aıyp taǵylǵan soń Qylmystyq protsestik kodeks normasyna saı is jabyq qaralady.
Eske salsaq, bıyl kóktemde Aqtóbe qalasynda Aqtóbe medıtsına ortalyǵynyń dárigerin óltirip ketti. Keıin kúdikti polıtsııaǵa qarsylyq kórsetip, qashty. Sol kezde kólik aýdarylyp qalǵanymen, kúdikti tergeý ızolıatoryna jetkizildi.