Aqtóbede byltyr bolǵan oqýshynyń ólimine kúdikti qamaýǵa alyndy

AQTÓBE. QazAqparat - Aqtóbe oblysy Shalqar aýdany Aıshýaq aýylyndaǵy oqýshynyń jumbaq óliminen soń kúdikti qamaýǵa alyndy, dep habarlaıdy QazAqparat tilshisi.

Byltyr 20 jeltoqsan kúni Shalqar aýdany Aıshýaq aýylynda oqýshy jumbaq jaǵdaıda kóz jumdy. Aýdandyq aýrýhanasynyń bas dárigeri Jangeldi Bylqaıyrdyń aıtýynsha, oqıǵa bolǵan kúni 9-synyp oqýshysyn aldymen meıirbıkeniń úıine aparǵan. Balanyń tynys almaı jatqanyn bilgen meıirbıke úı janynda turatyn dárigerge habar bergen. Ol da kámeletke tolmaǵan balanyń mert bolǵanyn aıtyp, polıtsııa shaqyrdy.

Al búgin Shalqar aýdandyq sotynyń baspasóz qyzmeti kúdiktiniń qamaýǵa alynǵanyn habarlady.

«Shalqar aýdandyq soty QR QK-niń 106-baby 3-bóliginde kózdelgen, ıaǵnı, «Abaısyzda jábirlenýshiniń ólimine ákep soqqan densaýlyqqa qasaqana aýyr zııan keltirý» baby boıynsha kúdiktini 2 aı merzimge kúzetpen ustaý túrindegi bultartpaý sharasyn sanktsııalaý týraly ótinishhatty qanaǵattandyrdy. Qaýly zańdy kúshine engen joq»,- dep habarlady Shalqar aýdandyq sotynyń baspasóz qyzmeti.

Aıta keteıik, oqıǵanyń qalaı bolǵany ázirge belgisiz. Polıtsııa kúdikke ilingender týraly da aqparat bermedi.