Aqtóbede buzylǵan bógetterdi jóndeýge 4 mlrd teńgege jýyq qarjy jumsalady
Aqtóbe oblysy aýmaǵynda 206 gıdrotehnıkalyq qurylys bar. Onyń 174-i kommýnaldyq, 10-y respýblıkalyq jáne 22-ń jeke menshik. Oblys aýmaǵynda kóktemgi sý tasqyny kezinde 15 bóget buzyldy. Bul týraly Aqtóbe oblysynyń tabıǵı resýrstar jáne tabıǵatty paıdalanýdy retteý basqarmasy Kazinform tilshisiniń saýalyna jaýabynda habarlady.
- Tasqyn kezinde Alǵa aýdany boıynsha Kósem bógeti, Qobdada Jaryq bógetteri, Hromtaýda Maǵadjan bógeti, Áıteke bı aýdanynda Tereńsaı, Şerbakov bógetteri, Oıylda Aqkemer, Qaratal bógetteri, Yrǵyz aýdanynda Janys bı, Aqshı, Sheńbertal bógetteri jáne Temirde Qara, Qumsaı, Eńbekshi, Babataı, Shubarshy bógetteri buzyldy. Qazirgi tańda Tereńsaı, Şerbakov bógetteri jóndelip, T. Júrgenov aýylyndaǵy Yrǵyz ózeniniń boıy bekitilip jatyr. Alǵa aýdanynda Kósem bógeti qalpyna keltirilip, Sholaq bógetine kúrdeli jóndeý jumystary júrgiziledi. Qobda aýdany boıynsha Oral-Oıyl, Batys, Saýqaıyń, Qobda, Jaryq, Qyzyljar bógetterinde qurylys jumystary jalǵasyp jatyr. Tapsyrys berýshi - Qobda aýdanynyń ákimdigi. Oıyl aýdany boıynsha Qaratal, Aqkemer bógetteriniń qurylysy bastaldy,- dep habarlady Aqtóbe oblysynyń tabıǵı resýrstar jáne tabıǵatty paıdalanýdy retteý basqarmasy.
Sonymen birge Temir aýdanynda 8 qorǵanys bógetin salý, rekonstrýktsııalaý jáne kúrdeli jóndeý jumystary josparlanǵan. Onyń ishinde Qara bógeti qalpyna keltirildi, al Qopa jáne Qumsaı bógetteriniń qurylysy jyl sońyna deıin aıaqtalady. Shubarqudyq, Zadepo, Babataı, Eńbekshi, Shubarshy bógetterin salý úshin jobalyq-smetalyq qujattar ázirlenip jatyr.
- Yrǵyz aýdanynda Jaısańbaı, Quıylys, Belsher, Mamyr, Nura, Qutıkól, Yrǵyz bógetterin nyǵaıtý úshin jobalyq-smetalyq qujat ázirlenedi. Tapsyrys berýshi - Yrǵyz aýdanynyń ákimdigi. Óńirdegi bógetterdi jóndeýge, salýǵa respýblıkalyq qor esebinen shamamen 3,9 mlrd tg qarajattandyrylady. Jóndeý jumystary jyl sońyna deıin tolyq aıaqtalady. Sonymen birge QR Sý sharýashylyǵy komıtetiniń tapsyrmasyna sáıkes «Sý resýrstaryn paıdalanýdy retteý jáne qorǵaý jónindegi Jaıyq-Kaspıı basseındik ınspektsııasy» RMM Aqtóbe bólimi jáne «Sý resýrstaryn paıdalanýdy retteý jáne qorǵaý jónindegi Tobol-Torǵaı basseındik ınspektsııasy» RMM Qostanaı bóliminiń mamandary birigip, komıssııa qurdy. Óńirdegi 206 gıdrotehnıkalyq qurylysty kózben sholyp qaraý jumystaryn júrgizdi. Nátıjesinde 112 gıdrotehnıkalyq qurylysty jóndeý qajet bolyp tur, - dep málimet berdi Aqtóbe oblysynyń tabıǵı resýrstar jáne tabıǵatty paıdalanýdy retteý basqarmasy.
Al kommýnaldyq menshiktegi 174 gıdrotehnıkalyq qurylystardyń 17-ne kópfaktorly zertteý jumystary júrgiziledi. Qujat QR Sý resýrstary jáne ırrıgatsııa mınstrliginiń kelisimine joldandy.
Eske salsaq, qazirgi kezde «Aqtóbe» sý qoımasynda jóndeý jumysy júrgizilip jatyr. Sol úshin qoımadaǵy sýdyń 70% aǵyzyp jiberdi.