Aqtóbede birneshe sport kesheni men turǵyn úı qurylysy aıaqtalmaı tur
Keıingi jyldary Aqtóbe oblysynda qurylysy toqtap turǵan nysan sany artty. QR Sybaılas jemqorlyqqa qarsy is-qımyl agenttigi oblystyq departamentiniń basshysy Salamat Esqalıevtiń aıtýynsha, oblystaǵy árbir úshinshi nysan problemalyq dep tanylǵan. Qazirgi kezde Aqtóbe oblystyq qurylys, sáýlet jáne qala qurylysy basqarmasynyń basshysy qyzmetin atqarǵan Naǵymjan Aldııarov jumystan ketti. Al qurylysy toqtap turǵyn nysandarǵa qaıta joba jasalyp, qarjy bólinedi.
Áıteke bı aýdanynda turǵyn úı men sport kesheniniń qurylysy aıaqtalmady
Áıteke bı aýdanynda 2 qabatty 8 páterli eki turǵyn úıdiń qurylysy 2021 jyly bastaldy. Memlekettik satyp alý kezinde «RB-Stroı» JShS-i jeńimpaz dep tanylǵanymen, qurylys jumysyn júrgizgen kompanııa ózge. Negizi kelisimshart quny - 175 mln teńge. 2021 jyly 29 mln teńge, 32,5 mln teńge ıgerildi.
«Merdiger qurylysty aıaqtaýǵa qaýqarsyz. Birneshe ret quryltaıshysy aýysty. Esepshottary da buǵattaldy. Sotqa júgingen kezde bıyl qazan aıynda aıaqtaımyz dep aıtqan. Búginde eshteńe de istelgen joq, qurylys aıaqtalmady. Sotqa qaıta júginemiz. Osylaı júrgende saraptama ýaqyty da bitkeli tur», - dedi Áıteke bı aýdany ákiminiń orynbasary Arman Aldabergenov.
Sonymen birge aýdanda dene shynyqtyrý-saýyqtyrý kesheniniń qurylysy 2018 jyldan beri aıaqtalmaı tur.
«2018 jyly bastalǵan qurylysty merdiger aıaqtaı almaı, sot otyrysy ótti. Kásipkerge 8 mln teńge aıyppul salyndy. Keıin qaıta túzetý engizilip, merdiger anyqtaldy. Ekinshi merdiger de qurylys jumystaryn aıaqtamaı, is sotqa deıin bardy. Oǵan da 8 mln teńge aıyppul salyndy. Qazir qaıta túzetýdi qajet etip tur. Jaýyn-shashyn, qar kezinde kóp nárse búlindi. Tóbesi de jabylmaı, qabyrǵasy syr bere bastady. Tot basqan. Keı jerlerin qaıta buzyp, jańartý qajet», - dedi Aqtóbe oblystyq qurylys, sáýlet jáne qala qurylysy basqarmasy basshysynyń orynbasary Aslan Jarasbaev.
Yrǵyzda turǵyn úı men sport kesheniniń qurylysy aıaqsyz qaldy
Shalǵaı ornalasqan Yrǵyz aýdanynda da dál osyndaı jaǵdaı. Mundaǵy Qurylys aýylynda angar tıptes dene shynyqtyrý-saýyqtyrý kesheniniń irgetasy quıylǵan kúıi qalǵan.
«Merdiger 10 qabatty úı salatyn sııaqty jerdi qazyp, temir tartyp, tsement quıdy. Jobalaǵan kezde kelip, durystap qaraýy kerek edi»,- dedi aýyl turǵyny Temirbek Zeıinuly.
Alǵashqy kezde bul jobaǵa 244 mln teńge qarastyrylǵan. Alaıda «Erqanat» JShS-i jumysty durys júrgizbeı, kelisimshart úzildi. Endi qaıta memlekettik baıqaý jarııalanyp, keler jyly qurylys jandanýy tıis. Sondaı-aq aýdanda 8 qabatty turǵyn úı qurylysy aıaqtalmaı tur. «RB-Stroı» JShS-imen 175 mln teńgege kelisimshart jasalǵanymen, tolyq aıaqtalmady. Sý, gaz, jaryq jelisi tartylýy tıis. 22,7 mln teńgeniń jumysy qalyp tur.
«Kelisimshartty birjaqty buzýdy josparlap otyrmyz. Sebebi merdiger kompanııanyń esepshoty buǵattaýly, qurylysty ári qaraı jalǵastyrýǵa qaýqarsyz. Baılanysqa da shyqpaıdy», - dedi Yrǵyz aýdany ákiminiń mindetin atqarýshy Aıbek Óksikbaev.
Qarǵalyda óner mektebi men dene shynyqtyrý-saýyqtyrý kesheninde qurylys baıaý
Aqtóbe oblysy Qarǵaly aýdanynda qazir Óner mektebiniń qurylysy baıaý júrip jatyr. Qurylysy 2017 jyly bastalǵanymen merdiger qajetti materıaldardyń qymbat ekenin jeleý etip, birneshe jyl boıy sozyp júrip alǵan. Jobalyq-smetalyq qujatqa qaıta ózgertýler men tolyqtyrýlar engizilip, bıyl memlekettik saraptama qorytyndysy alyndy.
«Biz óner mektebin kópten kútken edik. Balalar únemi jańa ǵımaratqa qashan kóshetinderin suraıdy. Biz jumystyń qyzý júrip jatqanyn kórgenimizge qýanyshtymyz», - dedi aýyl turǵyny Sabına Qumarova.
Sonymen birge Qalǵaly aýdanynda 2018 jyly qurylysy bastalǵan dene shynyqtyrý kesheni áli kúnge deıin paıdalanýǵa berilmedi. Munda da jobalyq qujattamaǵa qaıta túzetý engizildi. Qurylys keler jyly sáýir aıynda aıaqtalýy tıis. Alaıda kestege jumys isteı almaǵan merdigerdi tapsyrys berýshi sotqa berdi. Sot memleket paıdasyna aıyppul óndirip alý týraly sheshim shyǵardy.
Qurylysy uzaqqa sozylǵan nysandarǵa basymdyq berdim – oblys ákimi
Bıyl qyrkúıek aıynda Aqtóbe oblysyna ákim bolyp taǵaıyndalǵan Ashat Shaharov qazirgi kezde aýdandardaǵy problemalyq nysandardy aralap júr. Olardyń arasynda mektep, sport kesheni, mádenıet oshaǵy men jol qurylysy, gaz tartý men sý qubyryn júrgizý nysandary bar.
«Aýdandarǵa alǵashqy saparymda problemalyq qurylysqa basymdyq berip otyrmyn. Halyq suranysy boıynsha sol nysandardyń qurylysyn jalǵastyrý úshin oblystyq máslıhat sessııasynda usynys jasap, áleýmettik nysandardy qoldanysqa berýge kúsh salamyz», - dedi Aqtóbe oblysynyń ákimi Ashat Shaharov.