Aqtóbede biryńǵaı býhgalterlik esep júıesi engizilip, oǵan onlaın monıtorıng júrgiziledi - Antıkor
Aqtóbe oblysynda balabaqsha, mektep dırektorlary men kolledj basshylary, esepshilerdi jıyp, túsindirý jumystary júrgizildi. QR Sybaılas jemqorlyqqa qarsy is-qımyl agenttigi Aqtóbe oblystyq departamenti jemqorlyq deregin joıý úshin júıelerdi ıntegratsııalaýdy usyndy.
- Elimizdegi bilim salasynda bıyl 200-den astam qylmystyq is tirkeldi. Kóbine býhgalterlik esepte ıntegratsııa bolmaı, aqsha jymqyrýǵa ákep soǵyp tur. Sondyqtan ishki aýdıt, tekserý komıssııa men qazynashylyq departamentin qosyp, jıyn ótkizdik. Endi biryńǵaı býhgalterlik esep júıesi engizilip, onlaın monıtorıng júrgiziledi. Sebebi №55 mektepte esepshi 400 mln teńgeden astam aqshany ıelendi. Mundaı derek taǵy 6 mektepte anyqtaldy. Jyl basynan beri oblysta úsh is tirkeldi. Eki aýdannyń bilim bóliminiń basshylaryna qatysty is qazir sotqa joldandy. Sonymen birge Aqtóbe qalasyndaǵy mektepterdiń birinde esepshige qatysty is tergelip jatyr,- dedi QR Sybaılas jemqorlyqqa qarsy is-qımyl agenttigi Aqtóbe oblystyq departamenti basshysynyń birinshi orynbasary Almat Myrzalıev.
Aqtóbede endi bilim salasyndaǵy qyzmetkerler jalaqysynyń shegi naqtylanady. Eger esepshotqa aýdarylǵan qarjy asyp ketse, birden tirkeledi.
- QR Oqý-aǵartý mınıstrligi men QR Sybaılas jemqorlyqqa qarsy is-qımyl agenttiginiń arasynda jol kartasy bekitildi. Ortalyqtandyrylǵan býhgalterııa júıesi qurylyp, zańdy tulǵa retinde tirkeldi. Barlyq qalalyq mekteptiń býhgalterııasy ortalyqtandyrylǵan júıege enedi. Jumys 2025 jyldyń qańtarynan bastap iske asady. Maqsat – jemqorlyq derekti azaıtý. Qazir 12 aýdanda osy júıe jumys istep tur,- dedi Aqtóbe oblystyq bilim basqarmasy basshysynyń orynbasary Artýr Áýezov.
Aıta keteıik, Aqtóbede lýdoman esepshi men oǵan erik berip qoıǵan mektep dırektory sottaldy.