Aqtóbede bos jumys oryndary jármeńkesi ótti

AQTÓBE. QazAqparat - Aqtóbe qalasyndaǵy jumyspen qamtý ortalyǵynda 800-den astam jumyssyz tirkelgen. Búgin 72 mekeme olarǵa 1 myńǵa jýyq jumys ornyn usyndy, dep habarlaıdy QazAqparat tilshisi.

Aqtóbede jumyssyzdar men jumys berýshiler bir-biriniń usynys, suranystaryn taǵy bir qarap shyqty. Kez kelgen mekemege esepshi, saýda qyzmetkerleri kerek. Qurylysshylar men munaıshylarǵa, dárigerler men muǵalimderge de suranys bar. Al Aqtóbe oblysy boıynsha Qylmystyq atqarý júıesi departamentiniń KA 168/2 mekemesi psıhıator, rentgenolog, dermatovenerolog, ftızıator sekildi birneshe dárigerdiń orny bos turǵanyn jetkizdi.

«Bizdiń mekemege dárigerler qajet. Aqtóbede medıtsınalyq joǵary oqý orny bolǵanymen, arnaıy mamandyq berilmeıdi. Sondyqtan Almaty, Astanadaǵy jastardy shaqyryp jatyrmyz. Bizge jasy 35-ten aspaǵan dárigerler shaqyrylady. Sebebi, arnaıy mekemede jumys isteıtin mamandar 45 jasynda zeınetke shyǵady. Dárigerlerimizdiń bári zeınetke ketti»,- deıdi mekemeniń kadr jumysy bólimshesiniń bastyǵy.
 

«Nur Otan» partııasynyń «Sátti qadam» jobasy aıasynda bos jumys oryndary jármeńkesine 72 bilim, densaýlyq saqtaý, qurylys, saýda, qyzmet kórsetý salasyndaǵy jumys berýshi mekeme qatysty. Barlyǵy 1 myńǵa jýyq jumys orny usynyldy.

«Munaıshylardyń keıbiri 50 myń teńge eńbekaqyǵa kelisip jatyr. Keıbiri jumys taýyp alyp, qaıta eńbekke aralasqan. Olardyń arasynda qaıta mamandyq alý úshin qysqa merzimdi kýrstarǵa jazylǵandar da bar. Bıyl 500-den astam adam qaıta oqytyldady. Qazirgi ýaqytta munaı kompanııalarynyń jumysshylary qysqarady degen málimet kelip túsken joq»,- dedi qalalyq jumyspen qamtý jáne áleýmettik baǵdarlamalar bóliminiń basshysy Neılá Bórtebaeva.
 

Al raqymshylyqqa ilikkenderdiń 20-sy qalalyq jumyspen qamtý jáne áleýmettik baǵdarlamalar bólimine jumyssyz retinde tirkeýge alyndy. Ekeýi oqýǵa jiberilip, úsheýi «Jasyl el» jastar jasaǵyna qosylyp, qalany kógaldandyrý jumystaryna tartyldy. Úsh adam jumysqa ornalasyp úlgerdi.

«Qazirgi ýaqytta túrmeden shyqqan 4 adamdy taba almaı jatyrmyz. Olar bostandyqqa shyqpas buryn mekenjaıyn qaldyrady. Jergilikti polıtsııamen birge izdep jatyrmyz, ázirge habar joq. Raqymshylyqqa ilikkenderdiń jeteýine jumyspen qamtý ortalyǵynyń mamandary arnaıy baryp, shaqyrdy. Olar áli ortalyqqa kelip, tirkelgen joq»,- deıdi N.Bórtebaeva.