Aqtóbede borandy kúni jolda qalǵan júzge jýyq adam jylytý beketine jetkizildi
Túnde Aqtóbede qutqarý jumystary júrdi. Oǵan 52 qutqarýshy men 14 tehnıka jumyldyryldy.
«Keshe saǵat 22:50-de Samara - Shymkent tasjolynda shekteý qoıylyp, qutqarýshylar jolaýshylar avtobýsyna (Bishkek - Máskeý baǵyty) Qarabutaq aýylyna deıin erip bardy. Jylytý beketi ornalasqan ortalyq meshitke 41 Ózbekstan jáne Tájikstan azamattaryn evakýatsııalady. Olar medıtsınalyq kómekti qajet etpedi», - dep habarlady oblystyq PD baspasóz qyzmeti.
Taǵy bir avtobýs Aqtóbe qalasyndaǵy janar-jaǵarmaı beketinde turyp qalǵan. Buzylǵan avtobýs ishindegi 54 adam Jańaqonys aýylyndaǵy meshitke ornalastyryldy. Bári Ózbektsan azamattary. Aýyryp, dáriger kómegine júgingen adam bolmady.
Aqtóbe oblysynyń TJD alys jolǵa shyqqan kezde daýyldy eskertýlerge beıjaı qaramaýǵa shaqyrady.
Eske salsaq, buǵan deıin borandy kúni barlyq baǵytta jol qozǵalysy shekteldi. 24 aqpan kúni aýa raıynyń qolaısyzdyǵyna baılanysty jan-jaqty avarııalyq-qutqarý jumystary júrgizildi. Aqtóbe oblysynyń 7 aýdanynda barlyǵy 596 jeńil avtokólik, 1 339 júk kóligi, 23 jolaýshylar avtobýsy toqtady. TJD kúshimen qar qursaýynda qalǵan avtokólikterden 13 adam qutqaryldy. Barlyǵy 520 adam evakýatsııalandy jáne 8 jylytý beketine ornalastyryldy.