Aqtóbede bilim berý, mádenıet, densaýlyq saqtaý salalarynyń ókilderi marapattaldy
Óner ortalyǵynda ótken saltanatty sharada oblys ákimi Ashat Shaharov barshany Respýblıka kúnimen quttyqtap, ordender men medaldardy tabystady.
«Memleket basshysy Qasym-Jomart Toqaev Respýblıka kúni eldiń memleket qurý jolyndaǵy tarıhı qadamynyń sımvoly dep mańyzdylyǵyn atap ótti. Bul kún – tek mereke ǵana emes, sonymen qatar Qazaqstan tarıhyndaǵy mańyzdy kezeńdi aıshyqtaıtyn ulttyq birliktiń kórinisi. Búgingi kúni memleketimiz damýdyń jańa deńgeıine kóterilip, álemdik qaýymdastyqta laıyqty orynǵa ıe boldy. Eń bastysy – halqymyz táýelsizdik alǵannan beri tynyshtyq pen turaqtylyqta beıbit kún keship keledi.
Ult bolyp uıysyp, yntymaǵy jarasqan el bolǵannan beri Aqtóbe jurtshylyǵy talaı aýqymdy ıgi isterdi tyndyryp, elimizdi nyǵaıtýǵa eleýli úles qosýda. Sý tasqyny saldaryn eńserý, kúni keshe ǵana ótken Referendýmda da el bolashaǵyn tereńnen oılaǵan qaýym birlik pen senimniń úlgisin kórsetti. Osy jetistikterdiń barlyǵy – memlekettiń saıasatyna degen árbir aqtóbeliktiń senimimen keldi. Otanǵa degen súıispenshilik urandaǵan sózden emes, naqty isten kórinedi. Elimizdiń damýyna tabandy eńbegimen úles qosyp júrgen azamattar árdaıym qurmetke laıyq», - dep atap ótti oblys ákimi quttyqtaý sózinde.
Marapattalǵandardyń arasynda eńbek ardagerleri, kásiporyn qyzmetkerleri, bilim berý, mádenıet, densaýlyq saqtaý salalarynyń ókilderi jáne basqalar bar.
«Qazaqstannyń eńbek sińirgen qaıratkeri» ataǵy ánshi Mıras Bekjanovqa berilse, Baýyrjan Momyshuly atyndaǵy ІІ dárejeli «Aıbyn» ordenimen eki márte Keńes Odaǵynyń batyry T.Bıgeldınov atyndaǵy Áýe qorǵanysy kúshteri Áskerı ınstıtýtynyń bastyǵy Tımýr Espaǵanbetov, «Parasat» ordenimen eńbek ardageri Qýan Qamalhan nagradtaldy. Birqatar aqtóbelik azamat «Qurmet», ІІІ dárejeli «Eńbek Dańqy» ordenderimen jáne «Jaýyngerlik erligi úshin», «Eren eńbegi úshin», «Shapaǵat» medaldarymen marapattaldy.
Aıtyp óteıik kúni keshe, Respýblıka kúni qarsańynda Aqordada ótken saltanatty jıynda el Prezıdenti ultaralyq beıbitshiliktiń damýyna sińirgen eleýli eńbegi úshin «El birligi» ordenin Qazaqstan halqy Assambleıasynyń múshesi, Aqtóbe oblystyq máslıhat depýtaty «Dınar-Elektromash» JShS teń quryltaıshysy S.Vıshnıakti jáne «Erligi úshin» medalimen Aqtóbe qalasynyń polıtsııa ınspektory F.Nurmanovty nagradtady.