Aqtóbede bıyl 47 adam sýıtsıdten kóz jumdy
Aqtóbe oblystyq prokýratýrasynyń málimetinshe, sýıtsıd jasaıtyndar sany artqan. Byltyr dál osy ýaqytta 128 derek tirkelse, bıyl 168-ge jetken. Orta eseppen kúnine 2 adam sýıtsıd jasaıdy.
«Aqtóbe qalasynda 143, Muǵaljarda 5, Shalqarda 4, Mártókte 3, Áıteke bı aýdanynda 3 jaǵdaı tirkeldi. Kópqabatty úılerden sekirý kezinde qoǵamda erekshe rezonans týyndaıdy. Bıyl osyndaı 5 jaǵdaı tirkeldi. Sáýir aıyndy úsh áıel kópqabatty úıden sekirdi. Onyń bireýi 25 qabatty «Aqtóbe-Ajary» turǵyn úı kesheninde bolsa, ekinshisi Aqtóbe qalasynyń ortalyǵyndaǵy toǵyz qabatty úıde anyqtaldy. Qazir oblys prokýratýrasy jergilikti atqarýshy organnyń atyna sýıtsıdtiń aldyn alý jóninde sharalar qabyldaý týraly hat joldady», - dep habarlady Aqtóbe oblystyq prokýratýra basqarmasynyń prokýrory Ashat Makaev. Prokýrordyń aıtýynsha, sýıtsıd jıi jasalatyn oryndarǵa monıtorıng júrgizip, olardy boldyrmaý úshin sharalar qabyldanýy tıis. Máselen, 25 qabatty turǵyn úı keshenindegi balkonnyń ashyq ýchaskelerine qorshaýlar ornatý mindet.
«Shatyrǵa shyǵatyn esikterdi qulyptaý mindeti kondomınıým tóraǵalary jáne múlik ıeleriniń birlistigi basqarýshylaryna júktelýi tıis. Sonymen birge sýıtsıdtiń aldyn alý jónindegi vedomstvoaralyq top quryp, árbir faktini zerttegen durys. Qaıǵyly oqıǵany boldyrmaý úshin arnaıy tetikterdi ázirleı otyryp, sebepterdi aıqyndaý, onyń ishinde halyqaralyq tájirıbeni zerdeleý jáne ony engizý týraly hat joldandy. Bul másele oblys prokýratýrasynyń erekshe nazarynda», - dedi prokýror Ashat Makaev.
Eske salsaq, bıyl sáýirde anasy men qyzy 25 qabatty úıdiń terezesinen sekirip mert boldy. Polıtsııa qylmystyq is qozǵaǵanymen, oqıǵanyń sebebi belgisiz kúıinde qaldy