Aqtóbede bir jasar balanyń jumbaq óliminen soń qylmystyq is qozǵaldy
Aqtóbe qalasynda 1 jasar bala jumbaq jaǵdaıda kóz jumyp, onyń janynda bolǵan 4 jasar bala «Aıala» ómirlik qıyn jaǵdaıǵa tap bolǵan balalar ortalyǵyna jiberildi.
Qazir sábı óliminen soń is qozǵalyp, tergeý júrip jatyr.
Búgin óńirlik kommýnıkatsııalar qyzmetinde bilim, densaýlyq saqtaý basqarmalarynyń ókilderi men polıtsııa mán-jaıdy aıtyp berdi.
«Jalpy bul otbasynda 5 bala bolǵan. Úsh balasy bir ákeden, eki balasy ekinshi ákeden. Bir balasy 2014 jyly týabitti júrek aýrýynan kóz jumǵan. Úsh bala bolǵan kezde anasy ata-ana quqyǵynan aıyryldy. Sol kezde bireýi Jaısań mektep-ınternatyna, ekinshisi «Jaına» ońaltý ortalyǵyna, úshinshisi «Aıala» ońaltý ortalyǵyna ornalastyryldy. Alaıda kishkentaıyn ákesi sot arqyly óz atyna jazdyryp, tegin berdi. Sóıtip ońaltý ortalyǵynan balany ózine alady. 2022 jyly taǵy bir bala dúnıege keledi. Baqylaý, tekserý kezinde polıtsııa olardy taǵy ata-ana quqyǵynan aıyrý úshin aryz túsiredi. Byltyr qazan aıynda balalary sábıler úıine tapsyrylyp, keıin ata-anasyna berildi. ıAǵnı, eki bala ata-anasymen birge turǵan. Buryn Aqtóbe qalasy Máskeý aýdany, keıin ıAsnoe aýyly turǵylyqty jeri bolyp sanaldy», - dedi oblystyq JPQB bastyǵy Ardana Saımaǵambetov.
Balalardy Aqtóbe qalasy bilim bóliminiń janyndaǵy qorǵanshylyq jáne qamqorshylyq keńesi de baqylaýǵa alǵan.
«Ata-anasynyń ishimdikke salynǵany belgili bolyp, byltyr qazan aıynda balalar «Úmit» sábı úıine ornalastyryldy. Biraq ákesi qorǵanshylyq jáne qamqorshylyq keńeske ótinish túsiredi. Ákesi ákelik quqyǵynan aıyrylmaǵan. Jumysy bar, esepte turmaǵany jóninde anyqtama berip, bala otbasyna jiberiledi. «Úmit» sábıler úıiniń mamandary da kishkentaı sábı úshin ana súti mańyzdy ekenin aıtqan. Bala týǵan ákesine qaıtarylǵanǵa deıin qalalyq bilim bóliminiń mamany turǵylyqty úıine baryp, zertteý júrgizgen. Óndiristik baza janynda arnaıy bólme salynǵan. Balalar turýǵa múmkindik boldy. Jeltoqsan aıynda da tekserip bardy. Bári qalypty edi», - dedi oblystyq bilim basqarmasy basshysynyń orynbasary Dına Jamanbaeva.
Bul otbasyny dárigerler de óz baqylaýyna almaq bolǵan. Biraq anasy balalaryna eshqandaı ekpe jasatpaǵan, tipti bir de bir ret tekserýge aparmaǵan.
«Bala 2022 jyly 2 aqpanda kesir tiligimen ómirge ákeldi. Anasy júktilik kezinde eshqandaı da dárigerge qaralmaǵan. Týǵan kezde balanyń salmaǵy 1998 gramm boldy. Boıy 47 sm. Perzenthanadan jaqsy jaǵdaıda shyǵady. Keıin ýchaskelik dárigerlerge beriledi. Degenmen medıtsına qyzmetkerleri barǵan kezde adamdar úıinde bolmaıdy. Turǵylyqty jeri ózgerip, kóship-qonyp júrgen. Saldarynan eshqandaı vaktsına almady. Balada temir jetispeýshiligi dıagnozy bolǵan», - dedi oblystyq densaýlyq saqtaý basqarmasy basshysynyń orynbasary Baqyt Túlkibaeva.
Sábı 1 jas 21 kún tolǵanda kóz jumdy. Dárigerler anasynan surap-bilgende sábı qusyp, ishi ótip, kenetten qaıtys bolǵan.
Naqty dıagnozy sot-medıtsınalyq saraptamadan soń anyqtalady.
Qazirgi kezde osy oqıǵaǵa baılanysty Qylmystyq kodekstiń 141-baby boıynsha is qozǵaldy.
Ata-anasy óz mindetin tıisti oryndamaǵany úshin tergeý júrip jatyr.
Aıta keteıik, Aqtóbe oblysy boıynsha 333 qolaısyz otbasy esepte tur.
Jyl basynan beri úsh adam ata-ana quqyǵynan aıyryldy. Ákimshilik jaýapkershilikke tartý jumystary da júrgizildi.