Aqtóbede bir synyptyń barlyq túlegi bilim grantyna ıe boldy
Aqtóbe qalasy Qanysh Sátbaev atyndaǵy mektep-lıtseıin bıyl barlyǵy 51 túlek támamdady. Olardyń bári UBT tapsyryp, 34-i memlekettik bilim grantyn ıelendi. Ásirese bir synypta oqyǵan 17 túlek joǵary oqý ornyn tegin oqýǵa múmkindik aldy.
«Jyl ótken saıyn mektep túlekteriniń kórsetkishi artyp keledi. Munda oqýshylardyń nemese muǵalimderdiń ǵana emes, ata-ananyń da úlesi bar. Qyrkúıekte sabaqqa kelgennen bastap daıyndap, qosymsha bilim berýge basymdyq berdik. Túlekterdiń deni jaratylystaný baǵytyn tańdady. Lıtseı de osy salaǵa basymdyq beredi. Ózim joǵary oqý ornyn bitirgen soń, synyp alyp, jetekshilik ettim. Alǵashqy túlekterim osy», - dedi Q.Sátbaev mektep-lıtseıiniń fızıka pániniń muǵalimi Janseıit Isaǵalıev.
Túlekterdiń bireýi 123 ball jınaǵan. Mekteptegi eń úlken kórsetkish osy.
«Men UBT kezinde 114 ball jınadym. Oqýdy Almaty qalasynda jalǵastyramyn. Aqparattyq-tehnologııa fakýltetin tańdaǵan edim. Biz jeke-jeke emes, túgel synyp bolyp daıyndaldyq. Básekelestik joǵary boldy. Nátıjesinde bárimiz joǵary ball jınap, birge grant ıelendik. Básekelestik bar jerde damý bolady dep oılaımyn. ІT –joǵary suranysqa ıe mamandyq. Aldaǵy ýaqytta Qazaqstanda jumys istep, sheteldik kompanııalarda onlaın eńbek etkim keledi», - dedi memlekettik grant ıegeri Súleımen Eldosuly.
Aıta keteıik, oblys boıynsha bıyl 8 myńnan astam túlek mektep bitirdi. Onyń 3200-den astamy bilim grantyn ıelendi.