Aqtóbede bir ret qoldanýǵa arnalǵan qap shyǵaratyn tseh iske qosyldy
«Aqtóbe» ındýstrıaldy aımaǵynda taǵy bir kásiporyn jumysyn bastady. Bul úshin «FIBS KAZAKHSTAN» kompanııasyna 2 gektar jer berilgen. Joba quny - 1 mlrd teńge. Al qurylystyń I-kezeńinde 200 mln teńge ıgerildi. Bir ret paıdalanylatyn qaptar 500 - 2000 kelige deıingi salmaqtaǵy júkti kótere alady. Bıg-begter tsement, qum, túrli qospalar, tyńaıtqyshtar, túıirshikti plastık sııaqty materıaldardy qaptaý, tasymaldaý, saqtaý jáne túsirý kezinde yńǵaıly. Vagon qaptary kúkirt, bıdaı, qum sekildi ashyq tasymaldanatyn júkterdi qaptaýǵa qoldanylady.
«Endi bıg-begter óndirisin jolǵa qoıǵymyz keledi. Polıpropılendi matadan bastap, daıyn ónimge deıin ózimiz jasaıtyn bolamyz. «Aqtóbe» ındýstrıalyq aımaǵynan eki gektar jer aldyq. Ornalasqan jerimiz óte yńǵaıly, kommýnıkatsııalyq jeliler ótkizilgen. Marketıngtik taldaý jasaǵan kezde polıpropılen qaptaryna suranys bar ekenin anyqtadyq. Biz ónimniń sapasyna basa mán beremiz. Shıkizatty Reseıdiń Chelıabi men ıAroslavl qalasynan jetkizemiz. Búginde «TeńizShevroıl» kompanııasymen kelisimshart jasaldy. Olar bizden vagon qaptaryn alatyn boldy. Ázirge óndiriste 17 tigin mashınasy jumys isteıdi. Bul jabdyqtyń kómegimen jylyna 300 myń bıg-beg pen 30 myń vagon qabyn jasaı alamyz. Joba tolyq aıaqtalǵan ýaqytta óndiris qýattylyǵyn jylyna 1 mıllıon dana qapqa jetkizýdi josparlap otyrmyz», - dedi tseh dırektory Botagóz Taıbókenova.
Tsehta 30 adam jumys istep jatyr. Ekinshi kezeńde óndiris tsehy keńeıip, úshinshi kezeńde polıpropılenniń sapasyn arttyrý jáne jeke shıkizat bazasyn daıyndaýǵa arnalǵan nysannyń qurylys júredi. Al sońǵy kezeńde polıpropılen sapasyn arttyrýǵa arnalǵan jabdyqtar satyp alyp, jylyna 1 mıllıon dana qap shyǵarylady.