Aqtóbede bir mezette 15 myńnan astam adam Ánurandy oryndady
Tuńǵysh Prezıdent atyndaǵy saıabaqta ótken sharaǵa Aqtóbe oblysynyń ákimi Eraly Toǵjanov, eńbek ardagerleri, máslıhat depýtattary, Qoǵamdyq keńes músheleri, qoǵamdyq uıym ókilderi, belsendi jastar, memlekettik mekeme basshylary qatysty. Barlyǵy myńnan astam adam jınaldy. Aktsııa barysynda Memlekettik Týdy kóterý rásimi ótip, Ánuran oryndaldy.
«Asa daryndy qazaq aqyny Juban Moldaǵalıev kezinde myń ólip, myń tirilgen qazaqtyń muńyn shaǵyp, «Men qazaqpyn» degen poema jazǵan bolatyn. Ol kezde bul qaýipti edi. Biraq osy poemasynda asa daryndy aqyn qazaq halqynyń qaıǵysyn, qasiretin, umtylysyn, armanyn túgel qamtı jazdy. Sonyń ishindegi eń basty arman táýelsizdikke qol jetkizý edi. Al búgin bizdiń elimizde mańyzdy qujat qabyldanǵan kún. Bizdiń negizgi qaǵıdattarymyz anyqtaldy. Memleketimizdiń saıası-ekonomıkalyq, áleýmettik jáne rýhanı prıntsıpteri aıqyndalyp, bolashaq memleketimizdiń ishki jáne syrtqy saıasaty, onyń qaýipsizdigi jáne basqarý joldary belgilendi», - dedi fılosofııa ǵylymdarynyń doktory, professor Altaı Taıjanov.
Sonymen qatar 12 aýdanda patrıottyq máni zor saltanatty sharaǵa 15 myńnan astam adam qatysty.
Oblys ákimi baspasóz qyzmetiniń habarlaýynsha, Respýblıka kúnine oraı qaıyrymdylyq, ekologııalyq, patrıottyq sharalar uıymdastyrylyp, áleýmettik jáne sporttyq nysandar paıdalanýǵa berildi. Máselen, Alǵa aýdanynyń alty eldi mekeninde sýdy tazartatyn keshendi blok-modýl ornatylsa, Mártók aýdanynda elektrondy qyzmet kórsetý ortalyǵy ashyldy. Qarǵaly aýdanynda belsendi uzaq ómir súrý ortalyǵy, Shalqar aýdanynda salaýatty ómir saltyn qalyptastyrý ortalyǵy esigin aıqara ashty. Baıǵanın jáne Alǵa aýdandarynda sport jáne oıyn alańdary qoldanysqa berildi. Muǵaljar aýdanynyń Qandyaǵash qalasy men Saǵashıli aýylynda kópsalaly ashyq sport alańdary salynyp, Sheńgelshi, Qojasaı aýyldaryna aýyz sý jelisi iske qosyldy. Temir, Qarǵaly aýdandarynda jańa sport nysandary boı kóterip, Oıyl aýdanynyń Úshqudyq aýylyndaǵy jáne Alǵa aýdanynyń Jeruıyq, Qaraǵash, Marjanbulaq aýyldaryndaǵy joldardy ortasha jóndeý jumystary aıaqtaldy.