Aqtóbede bıyl 40 qazandyq pen 500-ge jýyq turǵyn úı jóndeledi

<p>AQTÓBE. KAZINFORM &ndash; Aqtóbede jylytý maýsymyna daıyndyq jumystaryna 18 mlrd teńge jumsalady. Qazirgi kezde jylý, ystyq jáne salqyn sý jáne káriz júıesine jóndeý jumystary júrip jatyr.</p>

Aqtóbe oblysynda 2500-den astam kópqabatty úı, 600-den astam qazandyq bolsa, bıyl shamamen 500-ge jýyq turǵyn úı men 40 qazandyq jóndeledi. Jóndeý jáne otyn daıyndaý jumystaryna 18 mıllıard teńgeden astam qarjy qarastyrylǵan. 

— Aqtóbe qalasynda Aqtóbe jylý elektr ortalyǵy 1941 jyly salynǵan. Sodan beri úzdiksiz jumys istep tur. Jol kartasyna sáıkes 908 mln teńgege 13 qazandyq pen 8 týrboagregatty jóndeý jospary bekitildi. Keıbirine kúrdeli, keıbirine aǵymdaǵy jóndeý jumysy júrgiziledi. Aqtóbe jylý elektr ortalyǵynda tozý deńgeıi ortasha 41% qurap otyr. Respýblıka boıynsha ortasha dep aıtýǵa bolady. Byltyr eshqandaı da apatty jaǵdaı tirkelmedi, - dedi Aqtóbe oblystyq energetıka jáne TÚKSh basqarmasy basshysynyń orynbasary Nurshashqan Іzbasarova. 

Al qaladaǵy sý, jylý jáne káriz júıesine jaýapty mekeme qazir jóndeý jumysyn júrgizip jatyr. 

— Investıtsııalyq baǵdarlama aıasynda sý júıesin qamtamasyz etý boıynsha 13 joba bar. Jalpy uzyndyǵy 18,6 km quraıdy. Keıbirin merdiger mekeme, keıbirin kompanııa jumysshylarynyń ózderi júrgizedi. Qazirgi kezde jol, júrginshiler jolyn qazbaı, burǵylaý jumysy arqyly qubyr tóseý ádisi tıimdi. Sonymen birge Aqtóbe qalasynda 3,3 shaqyrym bolatyn káriz qubyry aýystyrylady. Qalada káriz sorǵy stansasyn da jóndeımiz. Jylý qubyry boıynsha 8 joba bar. Onyń uzyndyǵy 2,5 shaqyrym bolady. Eń eski qubyrlar aýystyrylyp jatyr. Olarǵa 40-50 jyl bolǵan, - dedi «Aqtobe su-energy group» AQ kúrdeli qurylys bóliminiń basshysy Álıhan Takılov.