Aqtóbede basqa óńirlerge qaraǵanda eńbekaqy edáýir tómen – Ońdasyn Orazalın

AQTÓBE. QazAqparat - Oblys turǵyndarynyń ortasha eńbekaqysy 13,4% ósip, 173 myń teńgeden asty. Basqa óńirlermen salystyrǵanda áli de jalaqy edáýir tómen. Bul týraly oblys ákimi O.Orazalın esep berý kezdesýinde aıtty, dep habarlaıdy QazAqparat tilshisi.

Búgin Aqtóbe oblysynyń ákimi Ońdasyn Orazalın esep berý kezdesýin onlaın ótkizdi. Óńir basshysy azamattardyń tabysyn kóterý, óńir halqynyń ál-aýqatyn arttyrý máselesine basa nazar aýdardy.

«Tótenshe jaǵdaı kezinde 520 myńǵa jýyq aqtóbelik 20 mlrd teńge kóleminde áleýmettik tólem aldy. ​ 900-den astam kásiporyn 30 myń qyzmetkerdiń eńbekaqysyn ortasha alǵanda 10 %-dan 50 %-ǵa deıin ósirdi. Jalpy oblys turǵyndarynyń ortasha aılyq eńbekaqysy 13,4%-ǵa ósip, 173,4 myń teńgege jetti. Osy jyly halyq tabysyn arttyrý jumystary jalǵasatyn bolady. Memleket basshysynyń ınvestorlarǵa tikeleı bergen tapsyrmasy bar. Sonyń arqasynda ótken jyly munaı, ken oryndarynyń basshylary eńbekaqyny 30 paıyzǵa deıin ósirýge áreket jasady. Degenmen álde de eńbekaqy basqa óńirlerge qaraǵanda edáýir tómen. Jumysshylardyń talabyn túsinemiz. Eńbek qatynastaryn beıbit túrde sheship, halyqtyń ál-aýqatyn arttyrýdy kózdeımiz»,-dep jetkizdi oblys ákimi.

Aıta keteıik, ótken jyly «Jumyspen qamtýdyń jol kartasy» baǵdarlamasy aıasynda 41,5 mlrd teńge bólingen. Qarajattyń kóp bóligi 300 áleýmettik jáne ınfraqurylym jobalaryn júzege asyrýǵa baǵyttalyp, qosymsha 12,1 myńnan astam jumys orny ashyldy.

«Biz jumyssyzdyqqa jol bermeı, deńgeıin 4,8% ustaı aldyq. 23 myńnan asa jańa jumys orny quryldy.​ 54,2 myń adam «Nátıjeli jumyspen qamtýdy jáne jappaı kásipkerlikti damytý» baǵdarlamasymen eńbekke aralasty. Bıyl keminde 23 myń jańa jumys ornyn kózdeldi»,- dep atap ótti.